Tang-ang Cepcans magtige na
CEBU, Philippines — Ang labing hait nga mga magduduwa sa Cebu Executives and Professionals Chess Association magtakus sa ilang abilidad sa hiniusang Abril ug Mayo nga edisyon sa CEPCA monthly tournament karong adlawa diha sa Barracks Chess Club sa Robinsons Galleria Cebu.
Sugdan ang aksiyon sa ala-2 sa hapon.
Kapin sa P20,000 nga ganting salapi ang madawat sa mga mananaog kortersiya ni CEPCA president Engr. Jerry Maratas tipik sa iyang dalit sa adlaw niyang natawhan ngadto sa mga katropa niyang Cepcans.
Naglangkob sa mga top contenders mao sila si National Masters Rogelio Enriquez ug Arnolito Cadiz, Rosendo Yamyamin, Rey Flores, Peterson Sia, Amado Olea ug Jimmy Ty.
Tres minutos ang handicapping time control sa Class A, 10 minutos sa Class B ug 15 minutos sa Class C players.
Ang makampiyon mobulsa og P7,000, samtang ang mopahiluna sa ikaduha ngadto sa ikalimang dapit makadawat og P5,000, P3,000, P2,000 ug P1,000. Ang malandig sa ikaunom ngadto sa ika-10 nga puwesto mokubra og P500 matag usa.
Ang registration nagkantidad og P100 sa kiddies (14-under) ug ladies ug P200 sa mga Cepcans, apil na niini ang libreng snacks.
- Latest
