Talisay kampiyon gihapon sa Governor's Cup

CEBU, Philippines — Mipabuhagay og 24 puntos si Jay Deiparine, samtang si Keaton Clyde Taburnal mikawat sab og atensiyon sa dihang gipatikangkang sa Talisay City Aquastars ang Mandaue City Ballers  sa Game-3 sa ilang 'best-of-three' finals series aron  mahimong labing unang back-to-back champions sa Cebu Governor's Cup Inter-Cities and Municipalities Unde-21 Developmental Basketball Tournament.

Ang 18-anyos nga si Taburnal, kansang talento gisaytan sa Southwestern University (SWU) Cobras, miiskor lamang og 11 puntos, apan ang upat niya ka sagunson nga puntos sa katapusan nga 1:38 sa aksiyon maoy nahimong taytayan sa Talisay ngadto sa naglagiting nga kalampusan nga nagdalit kanila og P500,000 nga ganting salapi.

"Wa gyud ko mag-expect nga masud to akong itsa kay hugot kaayo ang depensa ni Brillo (Kenneth). Ang akong gihuna-huna niadtong tungora mao nga ang akong shot alang ni sa garbo sa mga Talisaynon. Para nilang tanan kining maong daog," matud pa ni Taburnal diin ang gipasabot mao ang lisud niyang step-back jumper nga nasud taliwala sa solidong depensa sa higanteng sentro sa Mandaue nga si Brillo.

Kuwarentay sayes ka segundos ang milabay, si Taburnal mipakita na sab og mura'g puthaw nga kaugatan pinaagi sa paglansang og duha ka free throws sa wala pa si Clark Louis Ruedas  milansang og laing pares sa krusyal nga foul throws nga maoy nagsilyo sa maayong palad sa Aquastars, 74-66 sa nahibilin nga 36 segundos sa duwa.

"Ang biggest factor ning among daog mao ang amoang teamwork. Miduwa mi as a team this time ug wala mi mag-iyaiya. Mao na ang naghatag nako og deperensiya ning higayona," matud pa ni Talisay coach Rey Michael Guerra nga nakaduwa uban ni PBA great Jojo Lastimosa sa dihang ang University of San Jose-Recoletos (USJ-R) Jaguars nakampiyon sa Cebu Amateur Athletic Association (CESAFI na karo) niadtong dekada '80s.

"Presyur kaayo ko kay kami defending champion pero malipayon kaayo kay amo gyud nga nakuha ang back-to-back titles. I would like to give credit to my boys for giving their all-out best when we needed it most," dugang pa ni Gurrea nga espesyal nga gipasidunggan ang reserve guard niyang si Ronan Briones, kansang hugot nga depensa naka-angkla sa opensa sa alas sa Mandaue nga si Gabriel Cometa.

"Dako kaayo og tabang namo si Briones. Tungod sa iyang depensa among nalimitahan si Cometa,"  sumala pa ni Gurrea sa iyang back-up wingman nga miamot og 10 puntos ug unom ka rebounds.

Si Cometa mitapos uban ang 19 puntos, apan mipasud lamang og unom sa 20 niya ka itsa. Gawas ni Cometa, naposasan sab sa Talisay si Brillo ngadto lamang sa otso puntos.

Nindot unta ng sinugdanan sa Mandaue nga sayo kaayong milabaw sa iskor nga 16-7, apan ang Talisay misugat sa ikaduhang kuwarter pinaagi sa 10 ka sagunson nga puntos nga miresulta ngadto sa 18-4 rally nga nakapaabante sa Aquastars sa hingpit, 32-24.

Ang Talisay miposte sa kinadak-an nilang labaw nga 12 puntos sa iskor nga 60-48 sa nakaon nga 27 segundos sa katapusang kuwarter.

Mibawos hinuon ang Mandaue pinaagi sa 18-8 run aron pagsikit niini ngadto na lang sa dos puntos, 66-68 sa katapusang dos minutos sa duwa.

Apan mao na diay kadto ang katapusan sa maayo salida sa Mandaue gumikan kay si Taburnal misul-ot sa kapa sa usa ka bayani pinaagi sa pagpasud sa iyang itsa atubangan ni Brillo ug dayon miposa og duha ka free throws nga nakaibot sa tunok sa Talisay sa himalatyong segundos sa duwa.

Si Ruedas mitampo og 13 puntos uban ang walo ka rebounds ug tulo ka assists sa Talisay.

Si Lemuel Jake Gonzaga dunay 14 puntos, samtang si Paul John Sungahid mitali og 12 puntos ug 11 puntos sa pilderong Mandaue. 

Bisan pa man niini, ang Ballers duna gihapo'y angay ikalipay gumikan kay mibulsa man sila og P300,000.

PUNTOS MATAG USA

TALISAY (74) – Deiparine 24, Ruedas 13,  Taburnal 11,  Briones 10,  Abarquez 9, Bacasmas 3, Beduya 2, Villabrille 2.

MANDAUE (69) – Cometa 19, Gonzaga 14,  Sungahid 12, Brillo 8,  Buscay 7, Marco 6,  Dabon 3.