Damgo nga natuman
Emmanuel B. Villaruel (Banat) - October 28, 2018 - 12:00am

CEBU, Philippines — Damgo nga natuman.

Mao kini ang paghulagway ni coach Joever  'Brad'  Samonte sa kalampusan nga natagamtaman sa University of Cebu (UC) Junior Webmasters duha ka gabii ang milabay.

Ang Junior Webmasters mikolapso human miabante og 21 puntos sa first half, apan nagsandig kini sa naglagiting nga duwa sa endgame aron pagsilhig sa University of the Visayas (UV) Baby Lancers, 83-81 sa 'best-of-three' finals series ug pagsakmit sa juniors division title sa 18th Cebu Schools Athletic Foundation, Inc.(CESAFI) men's basketball tournament niadtong Biyernes sa gabii diha sa Cebu Coliseum.

Si Jerick Ranido nga maoy Finals MVP mibahog og 20 puntos, tulo ka assists ug duha ka steals,   si Jushoa Gellacone mitali og 13 puntos ug lima ka rebounds, samtang si James Incio miiskor og 11 puntos alang sa Junior Webmasters nga misanta sa usa ka dekada nilang huwaw sa kampiyonato.

Katapusang naghari ang UC niadto pang 2008 sa dihang gipangulohan pa sila ni Randy Pogoy nga usa na karon ka bitoon sa PBA uban sa TNT KaTropa.

"Mao gyud ni ang moment nga among gipaabot tanan," matud pa ni Samonte nga gahilak samtang nahinabi sa mga tigbalita. "Amo gyud ni damgo nga makampiyon. Daw sa wala pa ko kasabot sa akong gibati nga amo na kining nahuman sa ikatulo namong pagsuway.

Si Samonte migiya sa UC ngadto sa ikatulo niining pagtaak sa finals sa miaging upat ka tuig. Apan nahagba sila sa mga kamot sa  Sacred Heart School-Ateneo de Cebu Magis Eagles sud sa duha ka higayon niadtong 2015 ug 2016 ug sa miaging tuig.

Karon ila na gyud nakab-ot ang ilang gihandum.

Nindot unta ang gipakitang labok sa Baby Lancers sa pagsugod diin sila naglabaw, 15-3,  apan ang UC, ubos sa pagpangu ni Incio  milusad og 19-0  run aron pagposte og 32-15 nga bentaha.

Ang tres ni Justin Mondares nga nakadagkot sa 7-2 run maoy nakahatag sa Jr. Webmasters sa kinadak-an nilang labaw, 39-18   sa nahibiling siyete minutos sa ikaduhang kuwarter.

Biya gihapon og 13 puntos, 65-52 sa sayong bahin sa katapusang period, ang Baby Lancers wala mawad-i og paglaum ug pinaagi nilang Gabriel Cometa, Franzel Basalo ug Albert Sacayan  milusad kini og  15-2 rally aron pagtabla sa iskor, 67-67  sa katapusang 5:36 sa duwa.

Nailog pa gani sa UV ang labaw, 75-73, apan sila si  Gellacone, Blanco ug Delgado mibida sa 6-0 run nga nakapaabante og balik sa UC, 79-75  sa nahibiling dos minutos.

Katapusang nakasikit ang Baby Lancers sa iskor nga 81-82 sa  basket ni  Cometa sa nahibilin nga nuybe segundos.

Sa katapusang han-ay sa kulbahinam nga aksiyon, si Justin Mondares mipasud og usa sa duha niya ka free throws sa oras nga dos segundos, apan igo na kaayo kining nakapalutaw sa Junior Webmasters ngadto sa panganod sa himaya.

DAMGO
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with