Wade mobalik sa heat alang sa katapusang salida
CEBU, Philippines – Ang three-time NBA champion nga si Dwyane Wade moduwa sa katapusan niyang season uban sa Miami Heat.
Gipahibalo niya ang iyang desisyon pinaagi sa usa ka YouTube video nga giulohan og "One Last Dance."
Ang 36-anyos nga star guard nagsilbe sa nag-una niyang 13 ka tuig sa liga uban sa Miami diin siya naghiusa og puwersa ni Shaquille O'Neal aron paghatag sa Heat sa labing una niining korona niadtong 2006 ug dayon uban ni LeBron James alang sa dugang duha ka titulo niadtong 2012 ug 2013. Mibiya hinuon si Wade sa Heat aron motapon sa Chicago Bulls niadtong 2016-2017 season. Sa miaging tuig, gisugdan niya ang lab-as niyang kampanya sa NBA isip teammate ni James sa Cleveland Cavaliers sa wala pa siya gi-trade niini og balik ngadto sa Miami.
Ang 12-time All-Star nga mitabang sa US paglabni og gold medal sa 2008 Olympics didto sa Beijing, nagkanayon sa 10 minutos niyang video nga andam na kaayo siya sa final niyang salida sa NBA. Sa miaging season sa Heat, si Wade mi-average og 16.3 points, 3.4 rebounds ug 3.1 assists matag duwa.
- Latest
