CEBU, Philippines – Banatan na ang South division semifinals sa 2nd Governor's Cup Inter-Cities and Municipalities Under-21 Developmental Basketball Tournament karong adlawa didto sa Alegria municipal gym.
Mo-host ang Alegria sa Sibonga sa alas-7:30 sa gabii, human ang wa'y pildeng Talisay City AquaStars makigtigi sa Barili sa pasiunang duwa nga gikatakda sa alas-6 sa gabii.
Samtang ang North semis nga adto tanan duwaon sa Mandaue City Cultural and Sports Complex unya pa sugdan karong Hunyo 26 diin ang defending North champion Consolacion Sarok Weavers makigharong sa Medellin ug ang Bantayan Seamasters makigpinaksitay sa San Francisco sa engkuwentro tali sa mga taga-isla.
Ang nahibiling buhi nga upat ka teams matag dibisyon magkumbati ubos sa single round robin format. Ang top 2 maoy mag-ilog sa division title sa usa ka best-of-three series.
Ang manghawod sa tagsa-tagsa ka dibisyon magtigi dayon alang sa overall championship nga usa gihapon ka best-of-three series.
Ang mokampiyon mobulsa og P500,000 nga ganting salapi, samtang ang runner-up makadawat og P300,000.