Popovich di kauban sa Spurs sa Game 4

CEBU, Philippines — Usa ka milagro ang gikinahanglan karon sa San Antonio Spurs aron mudaog batok sa Golden State Warriors tungod kay moduwa sila nga wala ilang head coach nga si Gregg Popovich kinsa di una mo-coach tungod kay bag-o lang mipanaw ang asawa niini.

Ang Spurs biya og 0-3 sa series batok sa Warriors ug maningkamot sila nga malikayan ang usa ka makauuwaw nga sweep sa kaugalingon nilang balwarte didto sa AT&T Center sa San Antonio, Texas.

Ang kapikas ni Popovich nga si Erin mipanaw niadtong Huwebes sa edad nga 67-anyos rasun nga gitugtan ra sa Spurs nga dili na mo-coach karon si Popovich. Mudala sa koponan ang assistant coach nga si Ettore Messina.

Si Messina nagkanayon nga nagtakilid ilang tsansa ilabi na nga lupig sila sa lineup sa Warriors tungod usab kay wala ilang star player nga si Kawhi Leonard, apan dili sila mulugak ug musukol sila aron makuha ang daog batok sa powerhouse Warriors.

 "Against a fantastic team like they are, we know what we're playing against. Doing everything a little bit better will be the key. I think the team is ready to play and compete. You can't get frustrated. You've got to get back on the court and try to prove everybody wrong," matud pa ni Messina sa Agence France Presse.

Misaad hinuon si Spurs star player LaMarcus Aldridge nga ipagawas ang tanan niyang kusug aron matabangan iyang koponan nga mudaog. (FREEMAN)