Sukmagay na
CEBU, Philippines - Maisip na si Donnie ‘Ahas’ Nietes nga usa sa mga Filipino boxing greats, apan palig-onon pa niya iyang legasiya pinaagi sa pagsakmit sa IBF flyweight title batok ni Komgrich Nantapech (22-3, 15KOs) sa Thailand karong gabii sa main event sa “Pinoy Pride 40: Domination” fight card didto sa Pacific Grand Ballroom sa Waterfront-Cebu City Hotel and Casino.
Si Nietes usa na ka two-division world champion, apan gusto niya nga malakip sa linya uban sa legendary nga sila si Manny ‘Pacman’ Pacquiao ug Nonito ‘The Filipino Flash’ Donaire Jr. isip mga Pinoy’ng boksidor nga nidaog og labing menos tulo ka kalibotanong korona sa managlahing weight division.
“Wa ko ka-imagine nga moabot ni nga chance sukad nga nag-start ko ani nga sport. Katong janitor ko sa ALA Gym, ako ra nga gusto nga mahimong boksidor ug modaog,” matud pa ni Nietes, ang nagkupot sa rekord isip longest reigning Filipino world champion.
“Wala ko ka-feel og pressure ani nga fight. Salig ko sa akong training ug dili nako usikan ni nga chance,” matud pa ni Nietes nga mitimbang og 112 lbs. sama sa iyang Thai nga kaatbang atol sa official weigh-in kagahapon didto sa Robinsons Galleria Cebu atrium.
Sa iyang bahin, si ALA Promotions President and CEO Michael Aldeguer nagkanayon nga ang determinasyon ug disiplina ni Nietes ang rason sa kalampusan niini ug sama sa miagi niining mga sangka, wala siya magduhaduha nga modaog iyang batos.
“His opponent says that Nietes is old but for me, Donnie is looking sharp and I think he still has a lot to offer being a world champion. He is getting better and better every fight and I have confidence in him for this one. Nantapech is tough but Donnie will always find a way,” matud pa ni Aldeguer.
Sa supporting bout, ang wa’y pildeng featherweight nga Mark ‘Magnifico’ Magsayo (15-0, 11KOs) misaad og “knockout” batok ni Issa ‘Peche Boy’ Nampepeche (24-7, 11KOs) sa Tanzania.
Sa laing sangka ning puno sa aksiyon nga boxing card nga gidalit sa ALA Promotions ug ABS-CBN Sports, si Jeo ‘Santino’ Santisima (12-2, 11KOs) moharong sa Indonesian fighter nga si Master Suro (11-8, 2KOs). (BANAT NEWS)
- Latest
