CEBU, Philippines - Bisita gikan sa Davao nga si Jose Joaquin Gonzales ug si Daisy Mae Derder maoy midominar sa tagsa-tagsa nila ka dibisyon sa Tri-X open water competition kagahapon didto sa Santa Fe Beach Club sa isla sa Bantayan.
Si Gonzales maoy nag-una sa maong 2-kilometer open water swim race sa oras nga 28 minutos ug 31 segundos. Gisundan ni Michael Ichiro Kong sa oras nga 31:10.
Si Kristianne Lim nalandig sa ikatulo sa oras nga 33:44.
Sa women’s class, si Derder maoy unang nihuman sa oras nga 48:13. Sila si Kimberly Dacay (49:23) ug Marie Geraldine Flores (50:27) maoy miangkon sa mosunod nga duha ka puwesto.
Sa laing bahin, si Alvin dela Torre maoy hari sa road cycling event batok sa mag-agaw nga sila si Jaybop ug Jet Pagnanawon nga mipahiluna sa ikaduha ug ikatulong dapit.
Si Louie Villacin maoy reyna sa women’s division uban sa mga runners-up nga sila si Arlette Maratas ug Ron Lancalale. Si Michael Flores maoy midaog sa class B uban nila ni Alistar Lubanga ug Constancio Abasola Jr. nga misakmit sa ikaduha ug ikatulong dapit. (BANAT NEWS)