Cavs, Warriors nagmadaugon

CEBU, Philippines - Nagmadaugon ang defending champion Cleveland Cavaliers ug Golden State Warriors  batok sa tagsa-tagsa nila ka mga kontra, samtang si Russell Westbrook misidlak sab sa kadaugan sa Oklahoma City Thunder sa mainit nga aksiyon sa NBA kagahapon.

Si LeBron James miratsada og 31 puntos, si Kyrie Irving midugang og 26, samtang si Kyle Korver milansang og unom ka tres sa iyang 22 puntos nga nagduslit sa 113-104 nga kadaugan sa Cavaliers batok sa Indiana Pacers. Si Korver nahimo nga ikapitong player nga nakabugha og 2,000 ka 3-pointers sa kasaysayan sa NBA.

Human sa nagkagidlay nilang agi niadtong Enero diin sila midaog lamang og pito sa 15 ka duwa, klarong namawi ang Cavs karong Pebrero diin sila kausa pa lamang napilde sa walo ka duwa.

Si Glenn Robinson III dunay 17 puntos sa Pacers  nga nasugamak sa ikalima nilang sagunson nga pilde.

Didto sa Oracle Arena sa Oakland, California, si Klay Thompson mitali og 10 sa iyang 35 puntos sa nagbagang rally sa ikatulong kuwarter nga maoy nagtuboy sa Warriors ngadto sa 109-86 nga demolisyon  sa silingan nilang Sacramento Kings.

Miamot si Stephen Curry og 13 puntos ug siyam ka assists, si Kevin Durant mihipos og 21 puntos, pito ka rebounds ug pito ka assists sa Warriors nga miinat sa labing nindot nga rekord sa NBA karon nga season ngadto sa 47-9.

Wala sab magpabitin si Westbrook nga mipabuhagay og 38 puntos sa ika-27 niyang triple-double karon nga season nga maoy nag-aswat sa Thunder ngadto sa 116-105 nga kalampusan batok sa New York Knicks.  Milangkat sab siya og 14 ka rebounds ug mipasa og  12 ka assists alang sa ika-64 nga triple-double sa iyang karera.

Miabag ni Westbrook mao si Victor Oladipo uban sa iyang 21 puntos.

Si Carmelo Anthony dunay 30 puntos ug si Derrick Rose mitali og 25 sa pilderong Knicks.

Sa lain pang mga aksiyon, si Isaiah Thomas mibubo og 13 sa iyang 33 puntos sa katapusang kuwarter sa dihang gipakgang sa Boston Celtics ang Philadelphia 76ers sa iskor nga 116-108, si Hassan Whiteside miyagyag og 23 puntos, 14 ka rebounds ug lima ka blocks sa dihang gipahagsa sa Miami Heat ang Houston Rockets sa iskor nga 117-107,  samtang sila si LaMarcus Aldridge ug Kawhi Leonard nagkumboya’g 45 puntos alang sa San Antonio Spurs nga milubong sa Orlando Magic sa iskor nga 107-79. (BANAT NEWS)