SWU naamong sa USPF
CEBU, Philippines - Naamong ang SWU Cobras sa natagak nang daan nga USPF Panthers human sila mapilde, 62-75 sa mahinungdanon nilang duwa pagtapos sa elimination round sa 2nd Capt. Raul Cabanero Inter-Collegiate basketball tournament niadtong Lunes didto sa Bulacao Talisay Sports Complex.
Ang Nigerian big man nga si Richly Managor ug Edwin Villarta nagkumboya’g 39 puntos aron mangu sa balanseng opensa sa Panthers nga miiskor sa labing una ug katapusang daog ning maong liga nga gipasiugdahan ni Bulacao Talisay Brgy. Capt. Raul Cabanero.
Sakit kaayo alang sa SWU ang maong kapildihan tungod kay ang nakaamong nila mao man ang kanhi wa’y daog nga USPF.
Ang USPF ug SWU hingpit nang nanamilit sa liga bitbit ang managsamang 1-4 win-loss records. Gumikan niini, ang CIT-U ug UC maoy miabante sa semifinals.
Sa crossover semifinals, ang No. 1 nga UV moharong sa no. 4 UC, samtang ang no. 2 USJ-R makigbatok sa no. 3 CIT-U.
Si Adam Camara mao sab ang nangu sa tanang scorers sa SWU nga mibugwak og 14 puntos.
Laing nakaiskor og double digits mao sila si Shaq Imperial ug Gerald Fernandez nga miwitik og 10 puntos matag usa.
Labaw og kuwatro puntos sa first period, 17-13, apan ang gutom nga Panthers padayong mirumbo sa nagkagidlay nga Cobras alang sa ilang 41-33 nga bentaha sa unang tunga.
Misamot ang kalbaryo sa Cobras dihang igo lang sila nakaiskor og sayes puntos sa tibuok fourth quarter.
Miabag ni Capt. Cabanero sa pagpasiugda sa maong liga mao ang iyang mga konsehales ilabi na nilang Banjo Abastillas, Darwin Cabanero ug Agnes Lastimosa ug sa tanang barangay Bulacao officials, SK task force.
Ang mga duwa gipadagan ni CESAFI deputy commissioner Danny Duran sa abag ni head technical referee Edwin Dejacto Sr.
Puntos matag usa
USPF (75) – Managor 24, Villarta 15, Colina 7, Avancena 7, Cada 6, Langahin 6, Quiachon 3, Batac 3, Patalinghug 2, Alocillo 2.
SWU (62) – Camara 14, Imperial 10, Fernandez 10, Luz 8, Racho 7, Molina 6, Roncal 6, Polican 1. (BANAT NEWS)
- Latest
