Warriors buhi pa
CEBU, Philippines - Sila si Gio Laguyo ug Conrad Catapusan milansang sa krusyal nilang mga tirada sa daginutong segundos nga nahabilin aron pag-agak sa University of San Carlos (USC) Warriors ngadto sa kulbahinam nga kadaugan batok sa University of the Visayas (UV) Green Lancers, 56-52 sa Game 3 sa “best-of-five” finals series sa 16th Cebu Schools Athletic Foundation, Inc. collegiate basketball finals kagabii didto sa Cebu Coliseum.
Si Laguyo mitapos lamang og otso puntos, samtang si Catapusan mipuntos og kuwarto, apan nahimo silang mga bayani nga nakahatag og laing kinabuhi sa Warriors.
Hinuon, alkansi pa gihapon sa serye ang Warriors sa baraha nga 1-2, apan posible silang makatabla kun modaog gihapon sila sa Game 4 nga gikatakda ugma sa alas- 5:30 sa hapon.
Nakapanimaho na unta og daog ang Lancers human sila nakalabaw og tres puntos, 52-49 sa nahabilin nga 1:33 sa duwa, apan mao na diay kadto ang katapusan nilang ratsada.
Human gitabla ni Laguyo ang iskor, 52-all, makalabaw unta ang Lancers, apan natapalan ni Scoty Ntumba ang short-jumper ni Monic Soliva.
Nakuha ni Laguyo ang bola ug milabay gilayon kini og maanindot nga pasa nga miresulta ngadto sa break-away lay-up ni Catapusan nga nakapaabante sa Warriors sa iskor nga 54-52 sa nahabilin nga 10.4 segundos.
Misamot pa ang kalbaryo sa Lancers sa dihang natawgan si Alfred Codilla og offensive foul sa nahabiling kuwatro segundos.
Sa tinguha nga makapatay og oras, dali nga gi-foul sa Lancers si Laguyo nga kalmado kaayong mipasud sa duha niya ka free throws aron pagselyado sa kadaugan sa Warriors sa nahabiling tres segundos.
Si Victor Rabat maoy bugtong player nga naka double-digit sa USC uban ang iyang 12 puntos, samtang sila si Malcolm Tan ug Ian Tagapan nagkumboya og 14 puntos. (BANAT NEWS)
- Latest
