RMD mikastigo sa Los Amigos sa LABA Caging

CEBU, Philippines - Ang RMD milatigo sa Los Amigos sa higpit nilang duwa sa LABA Basketball Tournament 2016 President’s Cup 1st Conference niadtong Lunes didto sa Barangay Banilad gym, dakbayan sa Mandaue.

Si Banjo Hatamosa maoy bida sa kadaugan sa RMD nga miratsada og 12 puntos. Sila si Geryl Bukiron, Dodoy Rizane ug Ronald Llanos mitampo’g 11 puntos matag usa sa RMD, kansang singko puntos nga labaw sa halftime, 38-33 miburot ngadto sa 15 sa tunga-tungang bahin sa final period, 80-65.

Ang Los Amigos gipangulohan ni Daniel Catinoy nga miburak og 28 puntos uban ang 12 ka rebounds, apan mahulog nga walay pulos ang iyang iskor kay wala man makabawi ang  iyang koponan human maapsi  sa sayong bahin sa second quarter.

Sa laing aksiyon,  ang AFN Realtor  ni Arnold Pestaño miiskor og daog pinaagi sa paglubong sa Villalon, 113-88.

Gipangulohan kini ni Rex Gonzaga, kinsa mikamada og 27 puntos, gisundan ni Barak Recto nga mitikdol og 20 puntos ug Ely Tantuan nga mitimang og 16 puntos. Mitimbre sab og 10 puntos matag usa sila si Merot Ygonia ug Richard Limosnero alang sa AFN Realtor nga wala gyud mahulga sa kinatibuk-ang duwa.

Ang Villalon nga aduna la’y lima ka players ang miduwa, gipangulohan ni Rechel Bamba nga mikadlit og 31 puntos ug adunay 15 ka rebounds. 

Upat sab ka players sa Villalon ang mihimo’g  double digits. Si Dexter Suico miamot og 19 puntos, gisundan ni Bernard Arreglo nga adunay 13 puntos. Ang team manager sa Villalon nga si Christopher Villalon miambit og 10 puntos.

Bisan pa sa ilang kapildihan, angayan gihapon nga daygon ang Villalon gumikan kay nakasugakod kini hangtod sa katapusang gutlo sa duwa.

Sa pasiunang duwa, ang New Millennium Hardware miariya na sab og daog human nila gilubong ang JJV Auto Supply sa iskor nga 101-85.

Gumikan kay wala moduwa ang usa sa ilang sinaligan nga si Canjo Echavez, si Eman Pacquiao maoy mibaswat sa kadaugan human moiskor og 19 puntos. Miarte sab si Bernard Rogado nga mitampo og 15 puntos. Ang gamay apan abtik nga si Lloyd Chavez miamot og 14 puntos.

Ang LABA president nga si Gilbert Sebandal mikulit og 13 puntos, samtang si Adie Cinco, kinsa  mibalik na og duwa gikan sa injury miabuno’g 12 puntos ug si Cris Ubas midugang og 10 puntos nga aduna na’y 4-3 nga baraha ug may purohan pa nga moabante sa  semifinals.

Ang mga duwa ubos sa superbisyon ni league commissioner’s Geryl Bukiron sa abag ni Adie Cinco.

Puntos matag usa

Unang duwa:

New Millennium Hardware (101) – Pacquiao 19, Rogado 15, Chavez 14, Sebandal 13, Cinco 12, Ubas 10, Mahilum 8, Catinoy 8, Monsanto 4.

JJV Auto Supply (85) – Monsanto 33, Landeza 15, Ceniza 11, Enriquez 10, Gersamio 10, Rostata 6.

Ikaduhang duwa:

AFN Realtor (113) –  Gonzaga 27, Recto 20, Tantuan 16, Ygonia 10, Limosnero 10, Villamor 9, Auman 8, Russiana 6, Pestaño 6, Cane 4.

Villalon (88) – Bamba 31, Suico 19, Arreglo 15, Perez 13, Villalon 10.

Ikatulong duwa:

RMB (88) – Hatamosa 12, Bukiron 11, Rizane 11, Llanos 11, Medillo 8, Cuizon 7, Gelbolingo 6, Lagaras 5, Colanse 4, Alcover 3, Yamomo 2, Magale 2.

Los Amigos (81) – Catinoy 28, E. Ouano 17, Gonzaga 17, M. Ouano 4, Gomez 4, Malazarte 3, D. Pestaño 2, Pestaño 2, Obsequias 2, Delima 2. (BANAT NEWS)