Pagara ug Magsayo impresibo sa sparring

CEBU, Philippines - Ang duha ka sumosulbong nga bitoon sa ALA Gym nga sila si  'Prince' Albert Pagara ug Mark 'Magnifico' Magsayo mihimo og impresyon atol sa ilang public sparring nga gidugokan og tawo niadtong Sabado didto sa Insular Square Mall sa dakbayan sa Mandaue.

Ang maong kalihukan tipik sa ilang preparasyon alang sa umaabot nilang away batok sa managlahing kontra nga maoy main event sa giatngan nga 'Pinoy Pride 35: Stars of the Future' fightcard karong Pebrero 27 diha sa Waterfront-Cebu City Hotel and Casino sa Lahug.

Sigun sa taho ni Dong Secuya sa Philboxing.com nga si Pagara, nga gikatakdang makigtakos ni Yesner Talavera  sa Nicaragua alang sa WBO Intercontinental super bantamweight title, milusad og hagpok ug mahait nga kombinasyon sa iyang pakig-sparring batok sa way pildeng lightweight contender nga si Arjan Canillas.

Samtang si Magsayo, nga moasdang batok ni Eduardo 'Fierita' Montoya sa Mexico alang sa WBO Youth featherweight title, impresibo sab pinaagi sa maanindot niyang footwork ug paspas nga kombinasyon batok ni super lightweight Elmo 'Bisdak' Traya, nga moaway sab sa umaabot nga promosyon sa ALA ug ABS-CBN Sports batok ni Romeo 'Jako' Jakosalem.

Ang uban pang boksidor nga mosalida sa 'Pinoy Pride 35' nag-sparring sab sud sa duha ka hugna, apil niini ang kanhi amateur champion nga si Kevin 'Jake' Cataraja nga miwadwad sab sa iyang abilidad batok ni Raul Yu nga gikalingaw og maayo sa mga nanan-aw. (BANAT SPORTS)