UV nakauna sa NBTC finals

CEBU, Philippines - Ang  University of the Visayas (UV) nagsandig sa kainit ni Jancork Cabahug, kinsa mipatuasik og 35 puntos ug dayon sa kadasig ni Marvin Oche sa overtime aron pagpukan sa defending champion Sacred Heart School-Ateneo de Cebu (SHS-AdC), 77-76, sa kulbahinam nga Game-1 sa best-of-three SM NBTC League Cebu Finals sa miaging adlaw didto sa Magis Eagles Arena sa SHS-Ateneo de Cebu didto sa Barangay Canduman, dakbayan sa Mandaue.

Nakuratan og maayo ang Magis Eagles sa gipakitang kaagresibo sa UV sa tibuok nga bahin sa duwa. Alkansi lamang og uno punto sa halftime, ang Baby Lancers nagmangtas pinaagi ni Cabahug nga miratsada og 14 puntos sa ikatulong kuwarter aron paglabaw nila og 10 puntos, 64-54.

Wala sab hinuon magpaalkansi ang Magis Eagles gumikan kay sa pagtambayayong nilang Jed Colonia ug Errol Pastor, nakalabaw sila og balik, 72-71 sa nahabilin nga nuybe segundos sa regulasyon. Human gi-foul sa nahabilin nga dos segundos, duna unta’y higayon si Cabahug nga iselyado ang daog sa Baby Lancers, apan usa lamang ka free throw ang iyang nasud hinungdan sa overtime.

Sa dugang singko minutos, makapaisag balhibo gihapon nga kumbati ang giladlad sa duha  ka  koponan   hangtod nga nakuha sa UV ang kadaugan.  (BANAT PALARO)