Beermen buhi pa

CEBU, Philippines – Nalikayan sa San Miguel Beermen ang usa ka makauuwaw nga sweep human

sa ilang come-from-behind nga kadaugan dihang ilang gipatapsingan ang Alaska Aces,110-104 , sa overtime aron maangkon ang daog sa Game 4 sa ilang best-of-seven finals series sa PBA Philippine

Cup kagabii didto sa Philsports Arena.

Ang Beermen mipugos karon sa serye ngadto sa Game 5 diin suwayan na usab nila nga mudaog aron mapabilin ilang paglaum sa kampiyonato batok sa Aces nga naglabaw sa standing 3-1.

Si Marcio Lassiter mibomba og 26 puntos aron pangulohan ang San Miguel, apan ang reserve nga si Gabby Espinas maoy mibida sa iyang 21 puntos diin iyang gihulipan ang trabaho sa bag-ong gikoronahan nga 'Best Player of the Conference' nga si JuneMar Fajardo kinsa wala gihapon kaduwa tungod sa injury.

Gipakita sa Aces nga desidido gyud sila nga mohimo og sweep sa Beermen ug milabaw sila og singko puntos sa halftime, 49-44.

Nanginit ang opensa nila ni Vic Manuel ug Chris Banchero nga maoy misugnod sa rally sa Alaska aron itukod ang 63-50 nga labaw sa hinapos nga kwatro minutos sa third period.

Pag-abot sa final period, init ang sinukliay sa puntos, apan mas nakabuwelo ang San Miguel tungod usab sa turnovers sa Alaska. Ang three-point play ni Gabby Espinas sa 1:47 sa duwa minaog sa labaw sa Aces ngadto sa uno punto, 92-93.

Padayun nga gidemalas ang Alaska ug hingpit nga nakuha sa San Miguel ang labaw human sa krusyal nga tip-in ni Arwind Santos alang sa 94-93 nga bintaha sa hinapos nga 28 segundos.

Pakyas ang Alaska pag-ilog og balik sa labaw human sa turnover ni JV Casio, samtang nakakuha og foul si Ronald Tubid nga mipasud sa iyang itsa aron ikandado ang daog sa San Miguel.  Nahatud hinuon ni Cyrus Baguio ang duwa sa overtime human sa iyang tres, apan wala ra usab kaarte ang Alaska sa overtime. (BANAT NEWS)