Converters nakauna sa E-League finals
CEBU, Philippines - Ang Convergys Converters mipakaging sa Teleperformance All Stars, 68-62, aron pagposte of 1-0 nga bintaha sa ilang best-of-three finals series sa 11th CSCC E-League men's basketball tournament niadtong Sabado sa City Sports Club-Cebu gym.
Si Franz Dione Dysam miratsada og 22 puntos uban ang upat ka rebounds ug upat ka assists sa Converters, nga nanginahanglan na lang karon og usa ka daog aron hingpit nga langkaton ang kampiyonato.
Si Sherwin Resilla midugang og 18 puntos, 10 ka rebounds, lima ka steals ug tagurha ka assists ug blocks alang sa Converters, nga migamit sa mainit nga opensa sa final half aron pagwani sa All Stars.
Alkansi ang Converters og kuwatro puntos sa halftime, 33-37, apan gilupig niini ang All-Stars sa ikatulong kuwarter, 18-12, aron pagbira og dos puntos nga labaw, 51-49, dayon na ngadto sa katapusang 10 minutos sa duwa. Wala na nagpaalkansi pa ang Converters aron pagkulit niini og sayes puntos nga kalampusan.
Si Karlo Rafael Miñoza maoy nangu sa All Stars bitbit ang 13 puntos. Sila sila Rodulfo Enterina III ug Ryan Veloso nagkumboya og 23 puntos sa pidlerong koponan. — (BANAT NEWS)
- Latest
