Cabibil, Padro hawod sa September CEPCA monthly

CEBU, Philippines – Sila si Tony Cabibil ug Rowena Padro maoy nanghawod sa September  edition sa binulan nga torneyo sa Cebu Executives and Professionals Chess Association niadtong Domingo didto sa Handuraw Pizza sa may dalan Gorordo, dakbayan sa Sugbo.

Sila si Cabibil ug Felix Shaun Balbona parehong mikulit og 6.0 puntos, apan si Cabibil maoy mibira sa titulo sa Group A gumikan sa simple tie. Si Peterson Sia maoy mipahiluna sa ikatulong dapit bitbit ang 3.5 puntos ug gisundan   ni Ben Dimaano nga dunay 3.0 puntos.

Bisan og mikapyot lamang sa ikaupat nga puwesto, si Dimaano nakaangkon gihapon og luna sa grand finals gumikan kay sila si Cabibil ug Sia pulos na man finalists, samtang si Balbona usa lamang ka guest player.

Sa group B, si Padro, usa ka varsity player gikan sa University of San Carlos, ug ang kasamtangang presidente sa CEPCA nga si Jerry Maratas parehong mitali og 4.0 puntos, apan si Padro maoy mibira sa korona sa mas taas niining tie-break output.

Bisan pa man niini, si Maratas gihapon maoy miabante ngadto sa  “Battle of Champions” karong Disyembre gumikan kay si Padro usa man lang ka guest participant.

Ang laing qualifiers mao sila si Rey Flores, NM Arnold Cadiz, Peterson Sia, Rosendo Yamyamin, Tony Cabibil, Jimmy Ty Jr., Carlo Maraat ug Amado Olea sa Group A ug Regelito Hortelano, Ruel Hortelano, Jun Kidlat, Elmer Odango, Jojo Paredes, Romy Pialan, Edwin Cablao ug Jessa Balbona sa Group B. (BANAT NEWS)

Show comments