Magpinaksitay na

CEBU, Philippines - Sugdan na ang aksiyon sa Visayas elimination sa 2015 Milo Little Olympics karong adlawa sa 14 ka managlahing binyu  didto  sa Iloilo City.

Ang binyu alang sa Visayas leg gibalhin human sa 19 ka tuig nga pag-host sa Sugbo, apan daghan gihapong mga Sugbuanong atleta ang mosalmot ning maong multi-sport event nga gipaluyohan sa Nestle Philippines.

Mobanat gihapon ang mga Sugbuanon sa tanang duwa sa elementarya ug sekondarya uban sa University of San Carlos (USC) nga mopadala sa ilang mga pambato sa halos tanang sports events sa tuyo nga magpabilin sa ilang mga kamot ang korona.

Mga duwa nga tigian naglakip sa tulo ka adlaw nga sporting events  ang  arnis, karatedo, athletics, badminton, basketball, football, gymnastics, tennis, swimming, table tennis ingon man non-Olympic events sama sa sepak takraw, chess ug scrabble.

Ang point system maoy gamiton pag-ila sa overall champion.

Ang top performers niining rehiyonal nga sangka maoy morepresentar sa Team Visayas sa Milo Little Olympics National Finals sunod buwan didto sa Laguna. (BANAT PALARO)