Puso pilde sa pera

Dili kadto usa ka holiday o  ‘pista opisyal’ sa miaging Biyernes, Agosto 7, apan ang ‘mood’ o pamati sa minilyon ka mga Pinoy basketball fans, daw dili mahimutang sa ilang kaikag ug kahigwaos sa pagpaabot sa resulta kun kinsa tali sa Pilipinas  o sa China ang makaangkon sa katungod pag-host sa  FIBA World Cup unya sa 2019.

Isip usa ka Pinoy, malipay unta ako kun Pilipinas pa maoy midaog ilabi na kay usa ako ka sportswriter. Malipay sab ako kun maka-cover sa maong international event.

Apan sa tinuoray sab, dali ra kaayo kitang nakadawat kay bisan asa nga anggulo batok sa makakagahum nga nasud sama sa China dili gyud kita modaog. Sa ‘bidding’ pa lang gani kun  kinsa’y mahimong host country sa FIBA World Cup pilde na kita unsa na kaha sa duwa.

Sa nagkalain-laing opinyon gikan sa tanang suok sa Pilipinas, ang tanan gyud Pinoy basketball fans naanugonan kay pakyas na sab kita sa atong tinguha nga dad-on sa atong tugkaran ang labing daku nga torneyo sa basketbol. Lahi kini sa Olympics. Kay ang kining Olympics usa man ka multi-event sports competition mintras kining FIBA pulos lang gyud basketbol. Naa ra sa ngalan nga FIBA kon International Basketball Federation ug ang orihinal niini nga French dialect mao kini: Federation Internationale de Basketball Amateur  (FIBA).

Sagdi na lang kadtong ubang opinyon kay ila kadto ug matud pa everybody is entitled to his/her opinion. Lagi kay opinyon lang, dili sawayon inay respitohan kay dili man sab tanan natong opinyon husto.

Sa akong bahin, aniay pipila ka rason nganong sa ‘bidding’ pa lang daan pilde na kita sa China.

Una, mas andam ang China tungod kay ang ilang mga binyu andam nang magamit bisan unsang orasa tungod kay sila maoy host sa 2008 Olympics. Gani, sa akong pagtuo, ang atong geographical position isip usa ka ‘archipelago’ maoy hinungdan nganong maglisud kita pag-host sa Olympics gawas pa bilyon ka pesos nga magasto sa maong event.

Ang FIBA World Cup mas gamay ra gani og gasto kay pulos ra man kini basketbol. Ang akong nasaksihan nga international event didto sa Gwangju, South Korea nga mao ang 28th Summer Universiade niadtong Hulyo 3-14, migasto kadto og $1 billion. Adunahan kaayo ang South Korea kay sila maoy naghimo  sa  Samsung  laptops, cellphones ug appliances, LG Electronics, KIA Motors – cars ug buses, Hyundai ug Daewoo.

Motuo lang ako nga maka-host kitang FIBA World Cup nga mas menos og gasto kun maka-host na kita’g Olympics ug sama sa damgo nga bunga lang sa atong katulogon, matag buka sa atong mata, mahanaw ang damgo ug wala na sa’y Olympics.

Ikaduhang rason, gamay ra kaayo ang atong gitanyag nga salapi nga P14 million, wala pa kana sa gasto sa fireworks sa opening ug closing ceremonies sa Beijing Olympics kun  itandi sa China nga mitanyag og $35 milyones.

Ato kining ikumparar sa usa ka birthday party sa usa ka dili kaayo sapian nga tawo kun itandi sa adunahan nga kun  mopakaon dili sayon hutdon kun  itandi sa usa ka ordinaryong hikay nga malimas lang dayon ang pagkaon. Kun ikaw ang papilion asa man ka sa usa ka tawo nga nag-party og hamburger ug french fries  o sa usa ka tawo nga midalit og lechon baboy, roasted calf, cakes ug fruit salad ug uban pa mga potahe. Siyempre adto ka sa lamian nga pagkaon.

Sa ato nang nakita  sa pipila na ka katuigan sukad matukod  ang Gilas Pilipinas,  wala kita’y laing pulong madungog o mabasa kun dili  ‘Puso’  ug alang kanako puol na kaayo kana. Ang tanang tawo ug mga hayop lakip na tingali ang jellyfish o bokya adunay ‘puso’ o kasingkasing, busa dili na nato kini sigihan og gamit. Ang China mas daghang Puso kay ang ilang population 1.35 billion kun itandi sa atua nga 101,865 million.

Matud pa sa panahom sa atong higala nga si Maxi Green, nga basin kuno wala pa malimot ang taga FIBA kun giunsa pagbugal-bugal nilang Jimmy Alapag ug Marcus Douthit ang basketbol dihang ilang gituyo nga adto ipa-shoot sa goal sa kontra sa pamasin nga kun mag-overtime, dili kita mapilde og otso puntos atol sa FIBA World Cup sa Spain sa miaging tuig.

Busa kun kamo’y mga sakop sa FIBA Board, kinsa may inyong pilion? Ayaw pamakak, more pa. Ako China.