Silvano modepensa sa PBF title karon
CEBU, Philippines – Panalipdan ni kanhi world title challenger Vergillio ‘Maton’ Silvano (19-4, 11KOs) ang iyang Philippine Boxing Federation flyweight belt batok sa taga-Leyte nga si Ryan Tampus (11-12, 8KOs) sa main event sa ‘Bakbakan sa Dalaguete-Fists of Fury’ karong gabii didto sa Dalaguete Sports Complex.
Gawas sa pagdepensa sa iyang PBF title, daku kining away alang ni Silvano ilabi na nga naglaraw siya nga subling makakuha og kahigayunan nga moaway alang sa usa ka regional title karong tuiga.
Ang 24-anyos nga si Silvano miaway duha ka tuig na ang milabay alang sa IBF minimumweight title, apan pakyas siya human mapilde ni Japanese champion Katsunari Takayama didto sa Osaka, Japan.
“Daghan gyud ko og nakat-onan human sa katong niaway ko sa world title, padayun lang ko nga naningkamot para sab makabalik ko og away og dakung bakus,” matud pa sa 24-anyos nga si Silvano.
Sa supporting main event, si Junie Salugaol (6-7,6KOs) sa Big Yellow Stable modepensa usab sa iyang PBF bantamweight belt batok ni Jelo Merlin (13-21,2KOs) sa Iloilo City.
Moaway usab sa maong card ang undefeated super bantamweight contender nga si Jhack ‘Golden Boy’ Tepora (12-0, 8KOs) batok sa former PABA champion ug veteran nga si Marvin ‘Bato’ Tampus (27-19, 18KOs).
Mokumpleto sa fight card mao ang sangka nila ni Keanan Villaflor vs Joyjoy Formentera; Rodel Wenceslao vs Ryan Maano; Allan Villanueva vs Jomar Blanco ug Aliasot Jr. vs Ervin Yamu.— LPM (BANAT NEWS)
- Latest
