Rematch
Mag-“rematch” karong adlawa sila si Floyd ‘Money’ Mayweather Jr. (46-0, 26KO) ug ang durable ug way kahadlok nga Argentine boxer Marcos Maidana (35-4, 31KO) didto sa MGM Grand, Las Vegas.
Nakataya niini ang bakus ni Mayweather sa WBC ug WBA junior middleweight ug welterweight belts.
Kun buot tan-awon, si Mayweather maoy adunay mawala kon mapilde siya niini nga sangka, samtang si Maidana maoy mohakot og daku kun masalakan niya pakatulog si Mayweather.
Sa report sa boxingscene.com, si Mauricio Sulaiman, ang presidente sa WBC miingon nga kun mapilde si Mayweather, lakip sa mawala kaniya ang 154 belt sa WBC.
Daan nang dunay pagduda sa unang panagsangka sa duha sayo niining tuiga nga daw gituyo lang ni Mayweather ang magpalupig sa unang unom ka rounds aron matawag nga mas “exciting” ang duwa una pa niya tinud-on si Maidana sa katapusang unom ka hugna.
Gituyo ba ni aron mosaka ang presyo sa sunod rematch? Si Mayweather pa gani maoy nangusog nga kinahanglang mag-”rematch” silang duha. Hinuon si Maidana, daan nang game sa rematch tungod kay bisan siya nagtuong siya maoy midaog sa puntosay.
Sama kang Manny Pacquiao, dugay-dugay nang wala makapatumba si Mayweather og kontra ibabaw sa ring. Ang katapusang napatumba ni Mayweather mao si Victor Ortiz niadtong 2011. Knockout nga way lami kay wala makabantay si Ortiz niadtong tungora kay nagsige siya og reklamo sa referee.
Ang katapusang klaro nga na-KO ni Mayweather mao si Ricky Hatton niadtong 2007.
Si Maidana sa iyang bahin, wala pa sukad ma-KO ni bisan kinsa nga iyang nakaatbang. Gahi kaayo og apapangig ug dili basta mahadlok. Labaw sa tanan ngilngig kaayo og rekord nga 31 sa 35 niya ka daog pulos KO.
Sa akong tan-aw, ang pagkaidlas ug pagka-asintado sa counter punching ni Mayweather maoy iyang gamiton. Sa akong tan-aw, sa sayong round pa lang mapatumba niya si Maidana.
Kun modaog si Mayweather niini, posible na kaha nga moatubang siya ni Pacquiao?
* * *
PAGTULON-AN: Never interrupt your enemy when he is making mistake. –Napoleon Bonaparte
- Latest
