Pacquiao-Algieri langawon
Nagsugod na ang media tour alang sa umaabot nga sangka nila ni Manny Pacquiao ug undefeated champion Chris Algieri. Kinahanglan gyud nila kini kay peligrong langawon.
Akong tan-awon ani, dili pa sakto pagkaluto si Algieri aron atubangon si Pacquiao ibabaw sa ring kon kuwarta maoy gipangita sa promosyon. Linghod pa kaayo ang maong Amerikano bisan pa man tuod og wala pay pilde. Di mawala sa huna-huna sa boxing fans ilabi na niadtong nag-inot nga mas liyamado gyud pirme si Pacquiao itandi kang Algieri.
Mas nindot pa gani tan-awon ug siguradong mokita’g daku si Bob Arum kon ang Briton nga si Amir Khan maoy ikasangka ni Pacquiao o di ba si Ruslan Provodnikov, kinsa gipilde ni Algieri niadtong Hunyo. Hinuon “worth” gihapon nga tan-awon kini tungod kay duna man kuno’y ikabuga si Algieri.
Ug sa mata sa mga Pinoy, bisan kinsa pay ibutang sa atubangan ni Pacquiao daghan gihapon ang manan-aw niini. Kay lahi ra kaayo og epekto sa mga Pinoy ang matag away ni Pacquiao itandi sa ubang sports nato.
Apan alang sa mga mahilig magpustahanay, aw di kini mo-click kon way buhatong makapakawhat sa atensyon kining duha ka boksidor samtang nag-media tour ug sa training camps.
* * *
Congratulations sa Yaw-Yan nga nagsaulog sa ilang ika-42 ka tuig nga kasumaran gikan naporma ni Supremo Napoleon A. Fernandez ang Sayaw ng Kamatayan (Yaw-Yan) nga misalingsing og maayo sama sa Yaw-Yan Ardigma Cebu ubos sa pagdumala ni Chief Executive Officer Master Ekin Caniga Jr., Congrats Bro!
Gikan sa pagkatukod sa Yaw-Yan bisan pa man sa mga bati nga paghulagway sa contact sports, dili ikalimod nga daghan kining kabataang naluwas gikan sa kadalanan ug nagumon sa ilegal nga drogas. Kaninyo sa Yaw-Yan, Kudos!
PAGTULON-AN: “Di ko mahadlok sa tawong nagpraktis og diyes mil ka klase nga patid, mas mahadlok ko sa tawong nagpraktis og usa lamang ka patid ka-diyes mil ka higayon,” – Bruce Lee
- Latest
