Pinoy fans salig ni Pacquiao
LAS VEGAS – Daghang mga Pinoy fans ang mituyo'g adto sa MGM Grand Garden Arena aron makit-an ang ilang idolo nga si Manny Pacquiao atol sa official weigh-in kagahapon.
Ang Pinoy community didto sa Las Vegas kompiyansa nga modaog si Pacquiao batok ni Timothy Bradley sa ilang "rematch" alang sa WBO welterweight title karong adlawa (oras sa Pilipinas).
"It’s Pacquiao by decision. He's strong and he looks good and I'm confident he will beat Bradley this time," matud sa taga-Leyte nga si Matthew Herman, kinsa atua na karon sa Estados Unidos.
Ang taga-Pampanga nga si Mary Ann Cuevas daku sab og pagtuo nga si Pacquiao ang modaog tungod kay kini ang labing ngilngig nga boksidor karon. Hinuon, ang Ilongo nga si Rudy Vistavilla naglaum nga mapatumba ni Pacquiao si Bradley aron tam-is ang iyang panimalos niini human mapilde sa ilang unang sangka niadtong Hunyo 2012.
Si Matther Herzanova sa Taguig, nagtuo nga nagdepende ang resulta sa away kun unsa nga matang nga Pacquiao ang mopakita.
Kun mogawas nga agresibo si Pacquiao, segurado nga mahayang si Bradley, apan depende kini kun dili ba maluoy ang Pinoy boxer. Ipadaplin una niini ang iyang pagka-relihiyoso. (BANAT NEWS)
- Latest
