Karaang Pacman
Unsa kining ritwal ni Timothy Bradley? Kaluod sab niining tawhana, dili maligo og usa ka semana sa dili pa kini mosaka sa ring.
Mao segurong wala gyud siya maratsada ni Manny Pacquiao sa una nilang sangka kay pwerteng "isuga" kun makig-bell to bell ang Pacman.
Bitaw, puyra bugal-bugal ning ato. Mas arang-arang na lang ni siya kay di maligo itandi kang Juan Manuel Marquez nga imnon iyang ihi aron daw siya makusgan.
Si Shane Mosley, kinsa gipilde ni Pacquiao niadtong 2011 miingon nga mas daku'g tsansa nga modaog si Bradley sa ikaduha niining pakigsangka sa Pambansang Kamao.
Sa akong tan-aw dunay punto niini si Mosley, kun dili mogawas ang gisaad ni Pacquiao nga "karaang Pacman" ang mosaka sa ring karong Abril 12. Basin matinuod ang pangagpas ni Mosley.
Si Bradley midaog kang Pacquiao duha na ka tuig ang milabay, daog nga daghan ang wala ganahi, gawas lang ni Mosley.
Usa lang gyud ang angay himuon ni Pacquiao ug wala nay lain pa, i-knockout si Bradley bisan asang round sa 12 ka hugna nilang sangka.
Daku kaayo ang posibilidad nga pildihon na pud sa puntos si Pacquiao kun moabot kini og 12 rounds ug makalahutay si Bradley.
Kini tungod kay bisan og duot-duot lang sa kumo ni Bradley counted man, apan ang kang Pacquiao, ang gibantayan lang kanunay mao ang iyang "power punches." Naanad man gud ang mga hurado sa volleys sa kumo ni Pacquiao nga pulos kusog.
Kining panahona, kinahanglang ma-impress ni Pacquiao dili lang ang mga hurado, kun dili hasta ang boxing fans.
Dili na mahalin pa si Pacquiao sa iyang bag-ong estilo nga "luoy-luoy" sa kontra o basin kampanti na siyang modaog gihapon sa puntosay bisan di niya i-knockout ang kaatbang.
Nakadayeg ko sa kadaugan niya kang Brandon Rios diin iyang gidominar ang mas bata ug mas daku nga kaatbang. Pero mura man sab og toro nga baka si Rios kay pulos lang abante way footworks.
Apan kun ang susama lang gihapong estilo ug kalagsik ang iyang gamiton kang Bradley lisud tuohan nga mabawi niya ang iyang dungog gikan sa gibansagang "Desert Storm" nga mipilde kang Marquez gamit ang iyang footwork ug inutok nga pakigharong.
Of course, di Marquez si Pacquiao, apan ang duha parehong gipilde ni Bradley.
* * *
PAGTULON-AN: "I learned that courage was not the absence of fear, but the triumph over it. The brave man is not he who does not feel afraid, but he who conquers that fear." — Nelson Mandela, former South African President
- Latest
