Third place Ilogan

CEBU, Philippines - Parehong midaug ang University of San Jose Recoletos (USJR) Jaguars ug ang University of San Carlos (USC) Warriors niadtong Sabado aron magtabla sa 3-2 nga baraha sa nagpadayong 13th season sa Cebu Schools Athletic Foundation, Inc. (CESAFI) didto sa USC Main Gym.

Tungod niini, mag-ilog ang Jaguars ug ang Warriors kung kinsa kanilang duha maoy makakuha sa ikatulong pwesto.

Segurado na hinoong makakuha'g twice-to-beat advantage ang Jaguars ug ang Warriors apan dili pa masuta kung kinsay ilang ikasangka sa quarterfinals samtang dili pa masuta kung kinsay modaug tali kanilang duha.

Midaug ang Jaguars batok sa University of Southern Philippines Foundation (USPF) Panthers (0-5) sa iskor 68-58.

 Sa laing bahin, naka-ikyas ang Warriors didto sa ilang homecourt diin misipyat sila'g 19 ka free throws sa wala pa sila mokulit og 67-64 nga kadaugan sa usa ka duwa diin mi-ulbo ang diyotay'ng kagubot ug miresulta kini ngadto sa pagka-eject sa tulo ka players nga silang Charles Pepito ug Dominic Adlawan sa Warriors ug Wyndell Santillan sa habig sa Webmasters.

Mitumaw ang kagubot may 6:11 ang oras sa second period diin naglabaw ang UC og otso puntos, 28-20 ug nahimo kining 30-20 human sa duha ka technical free throws ni Jan Michael Auditor nga maoy kinadak-ang labaw sa Webmasters.

Si referee Al Rile maoy mitawag sa ejection sa tulo ka players nga nalambigit og disqualifying foul tungod sa paggamit og kumo o "close fist".

Tungod sa kainit sa duwea, gitawagan sab og technical foul ang assistant coach sa Warriors nga si Junthy Valenzuela tungod sa pagsulod sa korte nga walay pananghid ug usa ka kalapasan sa lagda sa CESAFI may 4:45 ang oras sa fourth period ug labaw ang UC og dos puntos, 55-53. Nahimo sab kining 56-53 human sa technical free throw ni Edward Espiritu sa UC.

Wala madugay, nailog sa Warriors ang labaw human sa three-point play sa ilang Cameroon import nga si Ahmed Salihou, 64-61 may 35.3 segundos ang oras sa duwa ug maayong depensa ni Salihou sa nahibiling pipila ka segundos maoy nagsalbar kanila.

Si Salihou maoy nangu sa Warriors sa iyang 18 puntos ug midugang silang Victor Rabat ug Christian Laude ug 14 ug 12 puntos, matag usa samtang bugtong si Auditor maoy nakahimo'g double figures sa UC sa iyang 13 puntos.

Maayo sab nga pagka-katag sa puntos sa Jaguars apan bugtong si Kyle Lajato lang ang mihimo'g double figures sa iyang 12 puntos samtang silang Jomari Sollano, Art Camello ug John Paul Niño Batac pulos naka-double digits alang sa Panthers.   (BANAT SPORTS)