Dawn Ochea sa Adamson Falcons, Paul Desiderio sa U. P. Maroons

Duha ka batan-ong players tua na karon magduwa sa University Athletic Association of the Philippines (UAAP) nga anaa sa ilang Season 76. Sila maoy gitawag nga promising rookies. Mga bag-ong players sa team nga mao na unya'y mahimong sinaligan sa ilang teams ugma damlag.

Ang akong buot ipasabot dinhe mao silang Dawn Hynric Ochea kinsa sakop na karon sa Season 76 host Adamson University Falcons ug si Andres Paul Desiderio nga usa na ka "iskolar ng bayan" sa University of the Philippines (UP) Fighting Maroons.

Ang usa sa labing giatangan sa UAAP mao ang pagbalhin ni Jerie Marion Pingoy gikan sa Far Eastern University (FEU) Fern high school ngadto na sa Ateneo de Manila University (ADMU) Blue Eagles kinsa nagtinguha karon sa ilang ikaunom nga sunodsunod nga korona apan medyo dili maayo ang ilang pagbukas sa bag-ong season kay aduna na sila'y 0-3 nga win-loss record. Dili pa makaduwa si Pingoy kay mopailawom pa siya'g one-year residency ug swerte siya nga dili duha ka tuig nga residency ang gipahamtang kaniya tungod sa pag-apelar ni Sen. Pia Cayetano.

Duha na ka tuig ang milabay, kini silang Ochea ug Desiderio maoy mga leading scorers sa kanhi nila high school teams sa Cebu Schools Athletic Foundation, Inc. (CESAFI) dihang nagduwa pa si Ochea sa Sacred Heart School-Ateneo de Cebu Magis Eagles ug si Desiderio nagduwa pa sa University of the Visayas Baby Lancers.

Niadtong 2011, midaug ang UV sa titulo sa juniors division batok sa Magis Eagles, 85-82 sa Game 5 sa ilang best-of-five series diin si Desiderio maoy nangu sa Baby Lancers sa iyang 21 puntos ug si Ochea may 14 puntos nga maoy nagsunod sa top scorer nga si Henry Renzar Asilum nga may 19 puntos. Sa maong sangka, si Desiderio maoy napiling juniors MVP ug si Ochea nalakip sa Mythical Five.

Si Asilum ug Desiderio teammates na karon sa U.P. Fighting Maroons.

Sa miaging tuig diin nakabawos ang Magis Eagles batok sa Baby Lancers pinaagi sa three-game sweep (14-game record win) human sila modaug sa iskor, 77-72.

 Medyo nakalitan ang kampo sa Magis Eagles dihang nagpasad na sa USC gym ang mga balloons samtang wala pa opisyal nga mahuman ang duwa kay kuno nahinaykan sa tawo nga gipabantay sa Sacred Heart ang pisi nga naghigot sa net nga maoy gipustas sa mga balloons didto sa kisame.

Niadtong tungora may pipila pa  ka  segundos ang nahibilin ug labaw na ang Magis Eagles.

Si Desiderio lang gihapon maoy nangu sa Baby Lancers sa iyang 19 puntos samtang si Ochea igo lang naka-amot og nuybe puntos. Sa maong duwa, si Arc Gabrielle Araw-araw kinsa maoy nahimong bayani, maoy nangu sa opensa sa iyang 18 puntos.

CFBJ Inter-Color Volleyball. Mipakita'g kahayag ang gilaraw nga Cebu Federation of Beat  Journalists (CFBJ) Inter-Color Volleyball tournament nga gikatakdang sugdan sa dili pa matapos ang buwan sa Hulyo.

Nahisgotan pag-usab ang CFBJ Inter-Color volleyball kaniadtong Biyernes human sa regular board meeting sa Cebu Newscoop Multi-Purpose Cooperative didto sa Marcelo B. Fernan Press Center sa Sudlon, Lahug uban kang CFBJ chairman Elias Baquero.

Pipila sa mga importanteng butang nga gihisgotan naglakip sa mga galastoan sa referees, ipalit ug trophies ug premyo samtang gipahibalo sab nga adto magpraktisan ang mga teams sa barangay Tejero gym diin ang writer sa The Freeman nga si Gary Lao usa sa mga barangay konsehal.

Ang usa sa tigpasiugda sa maong torneyo nga si Liv Campo, nagkanayon nga aduna nay upat ka teams ang naporma ug mokabat na sa 60 ka mga sakop sa CFBJ.

Ang upat ka teams mao ang Orange, Blue, Green ug Yellow. Ang composition sa mga players matag team dili pa mahibaw-an kay bunotan pa ang mga ngalan kung asa sila mahisakop.

Labing menos napulo ngadto sa 15 ka players matag team ug duna kini sagol nga tulo ngadto sa lima ka lalaki nga interesado sab moduwa'g volleyball.

Ang CFBJ Inter-Color volleyball tournament ubos sa komitiba ni Joseph Tubilan kinsa maoy chairman sa Wellness and Physical Fitness Program inabagan sa mga sakop sa SCORE kun Sports Correspondents and Reporters. 

Matod pa ni Baquero nga nagkinahanglan siya'g tulo ka matang sa resolution kalabot sa pagpahigayon sa maong torneyo ug isumitir ngadto kaniya aron ma-aprubahan lakip na ang budget alang sa playing venue.