Gibasol ni Bise Mayor Tomas Osmeña si City Administrator Albert Tan sa kalangay sa suweldo sa mga job order o JO nga empleyado nga mag-unom na ka buwan nga wala pa g’yud makadawat sa ilang suweldo tungod kay matud pa sa bise mayor anaa ubos sa opisina ni Tan ang pagproseso sa suweldo sa mga JO.
Gibasol sa bise mayor si City Administrator Albert Tan tungod kay primero nga responsinilidad sa opisina niini ang suweldo sa mga JO nga wala pa makadawat sa ilang suweldo gikan sa buwan sa Oktobre sa tuig 2025 ingon man sa buwan sa Enero hangtod Marso 2026.
Kauwawan sa gobiyerno sa dakbayan sa Sugbo ang kapakyas sa paghatag niini sa suweldo sa mga JO ug project based nga mga empleyado kinsa naglisod gani sa pagpalit sa ilang mga pagkaon.
Nagpalabang sa Konseho sa dakbayan ang bise mayor og resolution nga nag-awhag sa mga JO ug project based nga mga empleyado sa pagsumitir direkta sa ilang mga requirements ngadto sa iyang opisina. Gipaklaro ni Osmeña nga samtang ang dakbayan padayon sa pagpanghatag og tabang pinansiyal ngadto sa mga senior citizens ug uban pang sektor sa katilingban apan ang iyang mga empleyado nabiyaan.
Misaad si Osmeña nga personal niining tan-awon ang mga reklamo ug mitanyag nga ibahin ang iyang suweldo ngadto sa mga JO nga padayon nga nagtrabaho sa iyang opisina bisan walay suweldo. Apan gisumbalik ni Mayor Nestor Archival si Osmeña. Giingon sa mayor nga ang nakalangay sa suweldo sa mga JO ug project-based nga empleyado mao ang burukrasya sa Konseho. Gipasabot sa mayor nga ang pag-andam sa payrol nagkinahanglan og pagtugot sa Konseho pinaagi sa resolution ug report o taho sa komitiba nga kasagaran molanat og pila buwan. Giklaro sa mayor nga ang JO nga empleyado mosumitir una sa iyang accomplishment report nga kinahanglan pa nga susihon pag-ayo sa Konseho sa dili pa i-proseso ang payrol. Adunay mga angayan nga ikonsiderar: una, naghimo ba ang JO sa iyang accomplishment report ug ang ikaduha, paaprobahan pa kini sa Konseho. Gipagawas sa mayor ang iyang pagkadismaya kay nganong siya ang basulon. Sila ang naglisud-lisud ako ang gibasul matud pa sa Mayor.
Samtang gihimo ni Osmeña ang iyang kaugalingon nga taytayan sa mga nagreklamo sa kalangay sa pagdawat sa ilang suweldo, giinsister usab sa mayor nga ang kalangay sa suweldo sa mga JO nakahigot sa procedure sa paghimo sa mga rekisitos nga gimugna sa Konseho.
Ang Konseho gipangulohan sa bise mayor. Mao ni ang dakong dimalas. Kay samtang nagkurog na sa kagutom ang mga JO ug project-based nga empleyado kay modagan na sa siyam ka buwan nga wala pa sila makadawat sa ilang suweldo, si Archival ug Osmeña nagduwa pa og pingpong. Naghapak-hapak pa sa bola kun kinsa ang mabasol sa problema ina kay ilang sulbaron ang problema.