Maleksiyon unta

Ang nahitabo sa usa ka tinun-an sa iladong unibersidad sa Manila nga gipriso karon kay nasakpang apil sa mga NPA nga nakiggubat sa mga sundalo, kakutloan unta og pagtulon-an sa ubang tinun-an.

Dili tiaw ang gibating kaguol karon sa mga ginikanan sa maong tinun-an nga nahitumpahawak sa alaot, kay nagpabiktima man siya sa mga mikumbinser kaniya nga moapil sa mga rebelde.

Dunay nakuha ang mga militar nga notes nga sinuwat sa maong tinun-an nga nagpakita nga siya kauban na gyud sa mga rebelde nga nakig-away sa kagamhanan.

Atol sa engkwentro sa mga NPA ug sundalo didto sa Mindoro Occidental, napatyan ang mga sundalo ug ang opisyal pa gyud sa grupo maoy nakalas. May duha pa ka sundalo ang naangol.

Nadakpan ang maong tinun-an ug nakuhaan siya og M16 Armalite rifle, ug usa ka granada, mao nga gipasakaan na siya’g kaso nga murder ug duha ka frustrated murder.

Dili siya makapiyansa sa iyang mga kaso. Dili katoohan ang pangangkon sa mga grupo nga kaalyado sa mga rebelde nga kuno ang mao nga tinun-an dili sakop sa NPA.

Makita sa mga sinuwat sa maong tinun-an nga nasakmit sa militar nga siya usa na gyud sa mga rebelde. Makapanglingo-lingo ta nga maghunahuna kon ngano nga madani man gyud kining mga batan-on sa NPA.

Sa miaging tuig, usa ka TV reporter sa Cebu miundang sa trabaho, ug kalit lang og kahanaw. Dantan og pila ka tuig, nahibaw-an na lang nga apil kini sa mga napatay sa gubat sa mga sundalo didto sa Negros Occidental.

Kamong mga tinun-an, mga utokan gyud mo, ayaw gyud pagpalingla sa mga tawo nga gamiton ra mo sa ilang kawsa. Dili gayud mahitabo nga ang mga rebelde modaog sa gubat batok sa mga sundalo.

* * *     

Buwan na karon sa Abril, apan pwerteng inita sa panahon kay nagsingabot na ang El Niño. Gaay kaayo ang mga parte sa panimalay, labi pa kadtong hinimo lang sa mga kahoy, plywood ug uban pa.

Mao nga magmatngon gyud ta nga malikayan ang sunog. Kaniadtong Biyernes Santo, diriyot tawon masunog ang studio namo sa DotTV sa sunog nga miulbo sa building dapit sa D. Jakosalem.

Dayon, misunod sab ang sunog sa kabalayan sa Barangay Ermita, nga dili ra layo sa Carbon Market. Ang nakapait pa gyud kay giswerte ang ubang kabalayan nga wa maapil sa sunog, apan gidemalas sab.

Nganong gidemalas? Kay wa tuod kini masunog apan gipangkawat ang mga butang sa mga kawatan nga atol sa sunog, nagpataka na lang og sulod sa kabalayan ug nanguha bisan unsa.