EDITORYAL - Pagkamatay ni Cabral

Duna ba kahay epekto ang pagkamatay ni kanhi DPWH undersecretary Catalina Cabral sa nagpadayong paggukod sa mga nalambigit sa kurapsyon sa flood control projects ug uban pang mga imprastraktura sa gobiyerno?

Matud pa sa report, dunay dakong kasayuran si Cabral aning kurapsyon nga giimbestigar karon kay usa siya sa gitumbok nga nagpalusot aning mga kickbacks ug budget insertions mga flood control projects lakip ani nga substandard ug ghost projects nga diin matud pa nakapangwarta ang mga politiko ug uban pang opisyal.

Ang Ombudsman mimando nang daan nga tarungon og hipos o kolekta ang mga gadgets ug cellphones ni Cabral sa pamasin nga dunay makuhang mga ebidensiya didto nga magkonektar sa imbestigasyon bahin aning anomalya sa flood control projects.

Posible sab nga kung tinuod nga siya naghikog, resulta kini sa grabeng presyur sa iyang sitwasyon.

Pressure gikan sa iyang pamilya, sa gobiyerno nga kaniadto iyang giserbisyohan  ug presyur gikan sa tanang mga nalambigit sa anomalya nga nabalakang basin mokanta siya atubangan sa mga imbestigador.

Kung tinuod ang mga pasangil batok kaniya, siguradong dunay ma-trace nga rekord ang mga digital forensic experts gikan sa iyang mga gadgets, cellphones ug laptops.

Basin pinaagi ani kung makuha ug makustodiya kini sa mga imbestigador mas mapadali ang pagsubay kun si kinsa nga mga proponents o mga magbabalaod, mga indibidwal nga opisyales sa gobiyerno nga kakunsabo aning kickbacks sa proyekto sa gobiyerno.

Sa nanglabay nga mga adlaw, pipila sa mga engineers ug opisyales sa DPWH na ang nitahan sa ilang kaugalingon ngadto sa mga otoridad nunot sa nagpadayung imbestigasyon bahin aning anomalya.

Ang uban gani nila, niuli gyud sa minilyon ka pesos nga kwarta nga giingong ilang nakawat gikan sa pundo sa mga proyekto.

Nagpakita kini nga tinuod gyud nga dunay mga opisyales nga nagbinuang ug gigamit ang ilang posisyon aron manangawat sa katawhan.