Mga hulga ni Pam
Siyam ka adlaw gikan karon, sa gusto niya o sa dili, mapugos si outgoing Governor Gwen Garcia pagkanaog sa Kapitolyo. Aron paghatag og agianan ni Governor-elect Pam Baricuatro. Kansang mga abaga gisangonan sa responsibilidad pagtarung sa mga binuang ni Garcia nga maoy nakapalubong niya og taga liog sa niaging eleksiyon.
Gipili sa kapin sa 1.1 milyones ka Sugboanon si Baricuatro. Kinahanglang tumanon ang iyang gipasalig nga pagpalambo sa provincial hospitals ug batakang mga serbisyo nga napasagdan sa mga paukyab ni Garcia.
* * *
Daghang ni-abiba nga malaumon sa liderato ni Baricuatro. Duna say nagduda nang daan niya. Nagbaha nang mga rekomendasyon unsay angay niyang himuon kinsay angay niyang itudlo sa importanteng mga puwesto. May mga pasidaan sab unsa ug kinsay likayan.
Gihatagan si Baricuatro og mandato sa pagdumala sa probinsiya sa mosunod nga tulo ka tuig. Nagkinahanglan siya sa tanang suporta ug pangaliya aron molampos. Ato siyang hatagan sa tanang kahigayonan sa pagpangulo ug pagtakda sa iyang direksiyon.
* * *
Dunay duha ka labing seryusong hulga sa administrasyong Baricuatro. Una, si Garcia. Nga nipakita sa tanang timaan sa paglawgaw sa bag-ong pamunoan. Gamiton ni Garcia ang tanang nahibilin niyang mga gaway sa Kapitolyo aron sa pagbabag sa mga plano ni Baricuatro.
Sama sa makasaysayanon niyang pagdaog sa eleksiyon, mabaraw ni Baricuatro ang tanang maniobra ni Garcia. Kon magpabilin ang suporta sa mayoriya sa mga Sugbuanon. Nga magpadayon pagpanalipod niya kon makapakita nga bisan sa tanang pagduda mas tarung ug mas takos siya.
* * *
Kay ang ikaduhang labing dakong hulga sa iyang administrasyon mao ra sab si Baricuatro. Kon mapakyas siya sa pagtambal sa labing masakiton ug pagpakaon sa labing gipanggutom ug pag-atiman sa labing nagkinahanglan sa Sugbo, bakwion sa mga Sugbuanon ang ilang suporta.
Mabulilyaso si Baricuatro kon makalimot sa iyang pasalig sa pagbarug para sa mga Sugbuanon. Nga mahitabo lang kon mapamatud-an nga dili siyang kamao (tungod sa kakuwang sa katakos ug kakugi), o utro sab diayng kurakot (pagpailad o pakigkonsabo gyod sa mga hakog og mga interes), o wala diay kalainan sa iyang gipulihan (pagsige og TikTok, pagpapilit sa iyang dagway sa tibuok isla ug pagsige og sayaw-sayaw tungod sa kahubog sa gahom).
* * *
- Latest
