Uswag gyud ning eleksyon

Dako ang posibilidad nga mauktaba na usab ang election sa mga opisyal sa barangay, apil na ang Sanguniang Kabataan (SK) nga gitakda na unta karong Disyembre 1.

Aprobado na sa third ug final reading sa Kongreso ang maong balaudnon nga nagsugyot nga ang election sa mga opisyal sa barangay adto na himoa sa tuig 2029.

Gipasabot nga himoon na nga unom ka tuig ang termino sa mga opisyal sa barangay, unya katugotan sila nga makapapili pag-usab og usa lang ka termino. Sa ato pa, 12 ka tuig sila nga mangatungdanan kon modaog. Nganong unya man sa 2029 ang sunod election base sa gisugyot nga balaod?

Kini tungod kay ang mga opisyal karon sa barangay napili man kaniadtong 2023, ug unom man ka tuig ang ilang termino. Daghang malipay niining maong kalamboan, apan sigurado ko nga duna say maguol, kadtong gusto nga mobanos sa katungdanan ug dugay na nga naglungot-lungot nga molansar pagka kapitan.

Aw, kadtong mga kapitan ug konsehal nga maayo sa ilang katungdanan, malipay gyud ta nga makapadayon sila sa pagserbisyo, apan makapanglingo-lingo ta niadtong way maayong serbisyo.

Daan na man namong gipanglantawan nga supakon gyud sa mga magbabalaod nga idayon ang eleksyon nga gitakda na karong Disyembre 1, kay makagasto na man sab sila, unya bag-o pa ang eleksyon.

Matud sa Supreme Court nga dili mahimo nga ang Kongreso ra maoy maghimo-himo og balaod nga magtagda sa adlaw sa election kay gilatid na kuno kini sa atong Konstitusyon.

Angay kuno nga kon gusto sa mga magbabalaod nga iuktaba ang pagpahigayon sa election, usbon usa ang Konstitusyon nga naglatid sa petsa sa election. Aw, bahala na ang mga batid sa balaod nga motuki niana.

* * *

Dia pa’y laing isyu nga gilantugian karon kon ang impeachment trial nga ipahigayon sa Senado mahimo ba nga saw-on ug ipadayon sa 20th Congress kon matapos na ang termino sa mga sakop sa 19th Congress karong Hunyo 30?

Dunay miingon nga naa kuno sa lagda sa Senado nga mahimo ra kini nga ipadayon sa 20th Congress kay ang Impeachment Trial dili man susama sa ordinaryong balaudnon nga kon dili mahuman, mobalik kini sa sinugdanan kon gustong ipadayon.

Nahimo man gani nga kataw-anan kay dunay mga senador nga bisan og sila maisip na nga senator-judges, apan giisip gihapon nila ang ilang kaugalingon nga duna sila’y gilabanan, ug kini mao ang gipasakaan og kaso. Pero usbon ko, angay gyud nga si Vice President Sara Duterte moatubang sa impeachment trial ug pamatud-an niya nga dili tinuod nga giwaldas niya ang minilyon ka pesos nga intelligence funds nga gipiyal kaniya.

Kay kon dili niya kini mahimo, usa kini sa posible nga rason nga yam-iran siya sa katawhan kon modayon siya’g lansar pagka presidente.