Kampanya human sa Mayo 12
Kinakusgan nga panagang sa vote-buying mao ang paghaw-as sa katawhan gikan sa kalisod. Kon dili na sila magpakilimos sa ayuda sa mga politiko bisan sa labing batakan nilang mga panginahanglan, sama sa bugas ug tambal, dili na sila mapugos sa pagbaligya sa ilang boto.
Pero dili kang kapaabot sa mga politiko nga modaog sa eleksiyon karong adlawa tungod sa vote-buying nga mosugot nga makalingkawas ang mga botante gikan sa ilang pagdiktar sa umaabot nga mga eleksiyon. Maong kinahanglang pahibaw-on ang mga botante nga sila ray makaputol sa lang-og nga pagpahimulos.
* * *
Kinahanglang sugdan dayon karong adlawa: Ang lapad ug hiniusang paglihok sa mga grupo nga nagtinguha pagbanhaw sa kabalaanon sa katungod sa pagpili ug pagpatigbabaw sa kaligdong sa eleksiyong presidensiyal sa 2028.
Maayong sinugdanan ang pagkumbinser sa ilang kaugalingon nga dili sila ray kamao busa ang mga botante angayng maminaw nila. Makatabang kon matinud-anon silang maminaw sa mga botante nganong wala makabalibad sa vote-buying.
* * *
Magamit nila ang nahibaw-an sa mga pagtuon sa Pilipinas ug sa ubang kanasuran nga padayong naproblema sa vote-buying:
• Mas epektibo ang pagpahibawo sa mga botante nga angayng balibaran ang vote-buying kay sa pagtambag sa pagdawat sa kuwarta pero botaran gihapon ang labing takos nga mga politiko (nga mahimong modasig sa katawhan pag-apil sa pangurakot); ug
• Mas makumbinser ang mga botante sa pagbalibad sa vote-buying kon pahibaw-on nga ang ilang pagpili sa kurakot nga mga politiko nga manghatag og kuwarta makahulga sa kaayuhan sa ilang katilingban bisan pa kon temporaryo nga makatagbaw sa ilang personal nga mga panginahanglan.
* * *
Sayon sultihon pero lisod himuon ang bisan unsang kampanya. Makadugang hinuon sa kahigayonan sa kalamposan kon mas sayo nga sugdan kay sa naandan nga ayha pa magkara-kara kon hapit nang eleksiyon. Mas gaan sab kon magtinbangay imbes mag-iyahay. Magsaw-anay sa aktuwal nga kasinatian sa pagpakigsulti sa katawhan.
Ug, labaw sa tanan, hinaot nga magkauyon ang nagpakabana nga mga grupo sa pag-abli sa ilang panghunahuna: Sa kahigayonan nga mas daghan silang makat-onan kay sa matudlo sa mga botante. Makaayo sa tanang hingtungdan kon ang kampanya dili ipasikad sa pagtuo nga ang mga namaligya sa ilang boto mga bugo ug ilarunon ug mapahimuslanon.
* * *
- Latest
