EDITORYAL - Maayo pang way dapigan

Daghang mga pundok-pundok sa nagkalain-laing komunidad ang nagpaklaro na sa kung si kinsa ang ilang mga kandidatong suportahan karong umaabot nga eleksyon sa bulan sa Mayo.

Kini sama sa mga senior citizens, womens, mga LGBTQ+Community, homeowners associations ug daghan pang uban. Sagad ani nila daghan og mga miyembro sa tinguhang mas madungog ang ilang tingog ug mga yangungo ngadto sa mga hingtungdan.

Apan samtang nindot kaayo paminawon nga dunay gidapigan, dili kini pagkatinuod maayo para sa ilang grupo.

Kay una sa tanan, kun ang usa ka pundok nipublikar na kung kinsa ilang kandidato o gidapigan, timan-an sila sa mga karibal sa kandidatong ilang gisuportahan.

Kun ang karibal maoy modaog, mag-unsa naman lang kining mga grupoha? Dili praktikal nga display kaayo ang pagdapig og kandidato para sa mga kahugpongan karon.

Gani mas labing maayo nga magpabilin silang neutral  sa panahon sa kampanya. Pinaagi sa pagpabiling neutral ug lig-on ang grupo, humot kaayo sila para sa mga kandidato.

Ani sab paagiha, bisan kinsa pay modaog human sa piniliay, makapaabot gihapon og kaayohan ang mga kahugpongan kay dili man sila “markado” nga adto dapig sa kaatbang.

Sa laktod pagka-estorya, mapahimuslan sa mga kahugpongan ang panahon sa kampanya aron sila makapili og maayong kandidato nga tinuoray nga motabang sa ilang kawsa.

Manimaan ra ba ang mga kandidato kun kinsa kadtong wala mosuporta kanila, unya kun kining wala suportahi maoy modaog unsa may makuha sa mga kahugpongan.

Busa mas maayong i-take advantage  ang panahon sa kampanya aron sila mailhan sa tanang kandidato nga potensyal nga motabang sa ilang panginahanglan, inay nga mamarkahan nga adto dapig sa kontra.