EDITORYAL - Peligro sa SRP viaduct

Sa nangaging mga adlaw, dunay mga post sa social media bahin aning mga kabataang magbahis-bahis diha sa South Road Properties viaduct ug manglabay og mga butang ngadto sa mga sakyanan.

Kani nga binuhatan dili ni maayo ug labaw nang dili binuhatan og tarong nga mga tawo. Wala manumbaling sa kaluwasan sa mga motoristang inosenteng nagdagan diha sa viaduct.

Kaning mga bataa, ang uban dili na gani menor de edad anha pud manukad aron moambak ngadto sa dagat.

Mismo sila sa ilang kaugalingon, wala magtan-aw nga gibutang nila sa peligro dili lang ang kaluwasan sa mga motorista kundili hasta pud sila.

Posible man gud nga madisgrasya ang sakyanan o motor nga maigo sa ilang pagpamato. Posible sab nga dunay dautang mahitabo kanila kun makatunong sila og drayber nga dili makapailob.

Hinuon wala pay natala nga naangol o nakabsan sa kinabuhi sa ilang gibuhat, apan peligro kaayo kini para nila tungod sa epekto sa lawas sa impact sa pagtugpa nila sa dagat.

Huwaton pa nga adunay aksidenteng mahitabo tungod sa pagpamato o ba kaha adunay mamatay aning mga bataa tungod sa pagbahis-bahis sa viaduct o ba kaha malumos?

Kang kinsa man kana nga responsibilidad ang pagbadlong? Kinahanglan gyud diay nga polis, ang sakop sa CCTO, DPWH o taga City Hall?

Dili ba diay kini tulobagon sa barangay diin nasakop ang viaduct diin manukad ug mangambak ning mga bataa?