Walay magpakilimos kon walay molimos

Miingon ang Ginoo: “Pangayo ug makadawat kamo.” Pero ang Cebu City Ordinance 1631, nzgdili sa pagpanghatag og limos sa mga mapakilimos sa kadalanan. Ang makasupak silotan. Pamultahon og P1,000 unya paserbisyohon sa komunidad og upat ka oras ang nangayog limos ug ang mihatag.

Dinhi, nagkaengkuwentro ang awhag sa Ginoo ug ang balaod sa tawo. Busa, nakapaaghat sa mga manggihatagong magtutuo pagsalom ngadto sa halawom kaayong pamalandong aron matugkad kon sala o dili ba ang pagpanghatag og limos sa street beggars sa kadalanan?

Niining bag-ohay lang, ubos sa pagpamunoan karon ni Cebu City Mayor Raymond Alvin Garcia, gihingusgan na sa Cebu City Anti-Mendicancy Board ang istriktong pagpatuman niini. Dugang mga otoridad ang ipakatap sa kadalanan aron sikopon gayod ang mga nakalapas sa balaod. Ang pangutana;

‘May madakpan na kaha, o basig maoy mopasulabi ang kaluoy?

Ako mismo, matag higayon nga mohunong ang sakyanan haduol sa mi-red na nga traffic light, dili kalikayan nga makapanglingolingo samtang nagtan-aw sa mga Badjao, kinsa taliwala sa naglagiting nga kainit sa adlaw, sagad magkugos og bata ug mosugat-manuktok sa bentana sa mga kotse aron mangayog limos dungan ang pagsinyas nga sila gigutom na. Busa, kinsa bang Kristiyanosa ang dili abotog kaluoy?

Mao nga bisan pa sa kadaghang sakyanan nga ilang gipanuktok walay nanghatag, aduna gyoy pipila nga nangabli-midunol og sensilyo, uy! Kinasingkasing kaha ang maong paghatag, o napugos lang kay nahadlok garasan ilang sakyanan? Nan, sa ilang maong matang sa pagpanghatag, wala ba sila makasala?

Alang nako, nakasala gihapon. Hinumdomi! Ang simbahan ug estado buwag diha sa pagpanday og balaod. Kon ang estado may balaod alang sa komunidad, kinahanglan sundon kini sa tanang katawhan apil na taga simbahan, sanglit ang katawhan kabahin man sa komunidad.

Maayo man ang tumong sa ordinansang gadili pagtunol og limos diha sa kadalanan nga dunay nagdagang daghang sakyanan. Sanglit, makapahilayo man kini sa dugoong disgrasya nga sa matag gutlo giatubang sa mosugat nga mga nagpakilimos. Adunay ubay-ubayng luwas lugar alang sa mga maikililimos. Ug didto nato sila hatagan.

Usa ray paaging mahanaw ang makililimos sa karsada. Ang dili na pagtunol og bisag unsa kanila. Kay kinsa pa bay magpakilimos kon wala nay molimos?