EDITORYAL - Phl gustong molingkod sa UN Security Council

Layo pa ang botohay para sa sunod nga mamahimong miyembro sa labing gamhanan nga konseho sa kalibutan, ang United Nations Security Council, nagsugod na ang Pilipinas og kampanya ug panguyab sa ubang mga nasud aron kini botaran.

Ang 15-member UN Security Council gilangkuban og mga nasud gikan sa nagkalain-laing suok sa kalibutan paghimo og mga desisyon kun mogamit og pwersa militar batok sa mga krisis, giyera, giyera sibil ug uban pa sa ubang mga nasud.

Ang Pilipinas kataposang nahimong miyembro niini niadtong tuig 2004-2005. Ang UN Security Council adunay 10 ka non-permanent members ug lima ka permanent members nga mao ang China, Russia, France, UK, ug Amerika.

Ang lima pulos mga “nuclear-armed” nga mga nasud ug nagbaton og pinakalig-on nga militar sa kalibutan. Sukad nga sila nahimong miyembro niini, wala na sila pulihi sa pwesto.

Ang pagkigubat batok sa laing nasud gidili sa Konstitusyon sa Pilipinas. Apan obligado ang mga Pilipino nga makiggubat aron panalipdan ang kaugalingon, teritoryo ug kagawasan niini.

Gawas pa nalibotan ang nasud og lapad nga kadagatan ug wala kini kapabilidad paglusad og pagpangatake sa ubang mga nasud.

Ang babag nalang niini kining kabahin sa isyu sa human rights abuses sa nasud ilabi na sa panahon sa nakalabay nga administrasyon nga nagtukod sa National Task Force to End Local Communist Armed Conflict (NTF-ELCAC).

Ang NTF-ELCAC nahimong kontrobersiya ug natutokan sa UN Human Rights Rapporteur tungod sa red-tagging niadtong mga nitingog kontra sa gobiyerno ug sa mga polisiya niini.

Bisan gani environmentalists, media, mga magtutudlo, kaparian ug mga doctor nabiktima sa red-tagging sa maong buhatan. Ang katuyoan sa pagtukod niini mao ang pagputol na sa insurhensiya sa mga hilit nga lugar. Si Presidente Ferdinand Marcos Jr. giawhag sa UN CHRC nga bungkagon ang NTF-ELCAC nunot sa maong mga alegasyon.

Hinuon ang Pilipinas wala nabantog sa kalibotan nga palaaway ug mangilog og dili iyaha, dili sama sa silingan niining permanente untang miyembro sa UN Security Council nga nasud sa China.