Kini ang buhata

Angay ng usbon sa katawhan ang batasan nga kon dunay sunog, mag-iyahay dayon sa pagpanghipos sa ilang kagamitan sa panimalay, ug pasagdan ra ang nagdilaab nga kayo.

Ang tukma unta nga himoon mao nga magtinabangay ang mga lumolupyo pagpawong sa kayo aron dili makasilaob nga mosangpot sa pagkaugdaw sa ilang kabalayan.

Aw, hinuon, kon dili na gyud kapugngan ug dako na ang pag-ulbo sa sunog, wa na tay laing mahimo gawas sa pagpanghipos sa atong mga butang.

Dili lalim kon ang sunog moulbo nga nakatulog ta, kay kon mahigmata ka sa kasaba sa mga silingan nimo, dili ka na mahinultol.

Kini maoy rason nga usa ka magtiayon ug duha ka batan-on, nangapagod sa sunog nga miulbo didto sa Sitio Putat, Barangay Tinago, Dakbayan sa Sugbo kaniadtong miaging kadlawon.

Kon mahitabo man gyud ang sunog sa atong lugar ug dili na mapugngan, siguroa pag-una nga luwas ang imong pamilya.

Dayon, isunod ang paghipos ang imong mga dokumento, sama sa mga ID ug ubang papeles, ug kuwarta. Dili sayon ang pagkuha sa mga papeles, mga government ID.

Dayon, ayaw kaayo katarantar ug ipabilin ang imong common sense  aron makahunahuna ka pa kon unsay angay ng himoon.

Angay ng mahibawo kamo sa contact numbers sa kabomberohan, ug sa kapolisan kay magamit nimo kini panahon sa emerhensiya.

* * *

Kaniadto dihang news reporter pa ko nga nag-cover sa police ug military, gipasiatab sa kadagkoan sa kapolisan ug militar nga napiangan na nila ang mga rebelde dinhi sa Kabisay-an.    

Tinuod, kaniadtong panahona wa na kaayo y pagpangatake nga gihimo ang mga New People s Army (NPA) batok sa mga tropa sa kagamhanan.

Apan karon, nakabantay ko nga mibalik na ang mga rebelde, ug gani kaniadtong Biyernes nahitabo ang pinusilay sa mga militar/polis batok sa mga rebelde didto sa Bohol.

Lima ka rebelde ang napatay, ug sa bahin sa kagamhanan nakalas sab ang usa ka polis ug naangol ang laing polis.

Didto sab sa Negros Occidental duna sa y nahitabong pinusilay tali sa mga rebeldeng NPA ug mga sundalo. Napatyan ang mga sundalo, apan mibawos sab ang mga militar.

Gani, ang kagamhanan migamit gyud og airstrikes batok sa mga rebelde nga giingong nagtago sa usa ka dapit sa kalasangan, apan tulo ra man ka rebelde ang giingong napatay.

Sa kalisang sa mga lumolupyo sa bukid, nanglayas sila sa ilang kabalayan sa kahadlok nga maangin sila sa panaggubat. Usa ka obispo sa Simbahang Katoliko misaway sa gihimo sa militar.

Naguol ko kay abi baya nako og masulbad na ang mga rebelde, ilabi na nga namatay na ang ilang lider, apan nagpungasi na man hinoon ang panaggubat.