Luyo sa pagbinuotan

Pinasikad sa: Mt. 25;31-46

Sa katapusang panahon kitang tanan moatubang sa atong hari nga mobarog usab ingon nga makatarunganong hari.

Matag usa hukman segun sa iyang binuhatan ngadto kang Jesu-Kristo nga atong gipadayag pinaagi sa pagtratar sa atong isig ka ingon nga nihulagway sa Ginoo nga atong gisimba.

Ug ang tinud-anay nga motibo diha sa atong pagtinarong sa kinabuhi. Sa atong naandang panabot ang langit alang gyud sa mga tawo nga nagmatinud-anon ngadto sa Dios.

Samtang ang Impiyerno alang kanila nga nagmasinupakon. Apan nindot hunahunaon nga luyo sa matag tinarong ug pagkamatinud-anan nagasukad sa paghigugma.

Nahadlok kita nga magpakasala sanglit ang pagpakasala mao man ang dakong pagluib nato sa bisan unsang commitment nga giako.

Samot na tingali ngadto sa Ginoo. Ang atong gugma kaniya atong gipakita usab pinaagi sa paghigugma sa atong isigkaingon.

Atong gikondisyon ang atong hunahuna ug pagbati nga matag pagbinuotan dunay ganti. Matag pagbinuang dunay silot.

Kun pabilin kitang mosubay ning maong panlantaw nan, mamahimong daw sa makina ang atong pagsabot sa relihiyon ug sa tinuohan.

Kinahanglang duna kitay isulod aron duna kitay makobra. Sa laing bahin, tinuod man nga dunay linugdangan ang matag binuhatan.

Apan mas makaayo nga atong isilsil sa atong hunahuna ug pagbati nga ang pagtuo dili lang kutob sa mga libro ug diskurso.

Daghang mga tawo nagtuo nga ang langit masinati nato inigkamatay na nato. Nahikalimot kita nga masinati diay nato ang langit pinaagi sa paghimo og bisan unsang maayo dinhi sa yuta.

Ang tinud-anay nga pagbasol atong mapakita pinaagi sa pag-usab sa atong kinabuhi. Dili tungod sa langit o sa kahadlok sa impiyerno, kondili tungod sa atong dakong gugma sa Ginoo.