EDITORYAL - Ang sakit nga “Basta Imported”
![EDITORYAL - Ang sakit nga �Basta Imported�](https://media.philstar.com/photos/2023/11/14/psntoon_2023-11-14_22-41-17.jpg)
Ang mga Pilipino mahiligon kaayo sa mga butang nga imported.
Bisan unsang butang basta gikan sa abroad ipanghambog gyud kini dayon ngadto sa mga kahigalaan ilabi na niadtong panahon nga higpit pa kaayo ang pag-import dinhi.
Apan salamat sa globalization, tungod niini giablihan ang merkado sa tanang matang sa produkto gikan sa gawas sa nasud.
Naguna-una dayun sa nakakuha og dakong pahat sa gikinahanglang supply sa tanang matang sa produkto dinhi sa Pilipinas ang China.
Ang kaniadto merkado sa Pilipinas nga gidominar sa mga produktong gikan sa Amerika, Japan, Germany, UK, Vietnam ug South Korean- made nga mga produkto
naupawan sa mga “Made in China.”
Dako kaayo og kalainan ang produkto sa China itandi sa produkto sa maong mga nasud.
Ang Chinese-made products, kinopya ra gikan sa mga western made products, dili kaparehas ang kalidad ug dali rang mawangwang, maguba, ug kuyaw
pang makadisgrasya.
Gikan sa hairclips hangtud na sa mga heavy machineries, naa ang China ug ilaha kining gibubo dinhi sa Pilipinas sa baratong presyo.
Sa laktod, gilawgan nila og maayo ang hilig sa mga Pilipino sa imported. Bahala og dali nga maguba, basta imported ug labaw sa tanan mas barato. Total kun maguba,
dali ra mang makapalit og ipuli kay barato ra ug daghan na kaayo ang supply niini.
Ang nakasubo lang, kaning pagkahilig sa mga Pilipino og ‘imported’ mao puy nipatay sa lokal nga industriya. Kadtong kaniadto mga kompanya ug pabrikang lokal wala na
makaapas sa gibubo nga mga produkto dinhi sa China.
Bisan mas lig-on ug de kalidad ilang hinimo, dili makaparang sa sub-standard nga Chinese products tungod kay ang giapas lang sa mga Pilipino dili na ang kalidad
kondili ang baratong presyo unya “imported pa gyud.”
Nihit na kaayo karon ang mga kompanyang Pilipino nga padayong naghimo og papel, notebook, krayola, lapis, erasers, lansang, thumbtacks, hairpins, kaldero, plato ug daghan pang ubang galamiton kay dili sila makabawi sa puhonan gumikan kay wala namay mopalit sa ilang produkto kay mas barato ang Chinese products.
Ang sakit nga “basta imported” maoy nipatay sa lokal nga industriya sa Pilipinas.
Tudloan unta sa mga ginikanan ang ilang mga anak nga suportahan ang lokal nga produkto.
- Latest