EDITORYAL - “Ningas-kugon”

Makahibulong kun nganong hangtud karon naa pa gihapoy mga spaghetti wires sa mga kadalanan sa Metro Cebu. Naa naman untay mga ordinansa ang mga dagkong siyudad nga nagmando sa mga telecommunication companies nga hipuson ilang mga nagkutay-kutay nga wires ug kable.

Ang uban niini wala na gani gamit, o dugay ng putol ug wala nay gagamit apan nagpabilin kining nagtapot ug nagbitay sa mga poste.

 Kaning maong mga wires peligro kaayo sa publiko, pwedeng masabod niini ang mga sakyanan ilabi na ang mga trak ug mabira ug mangatumba ang poste.

Pwede sab nga ang uban niini nitapot sa live nga kuryente sa electric company ug aksidenteng makakuryente og mga  tawo ilabi na mga bata.

Ang mga LGUs aning mga dagkong siyudad sama sa Cebu City, Mandaue City ug sa Lapu-Lapu City nagsige na og panawagan sa mga telcos nga panghipuson kining maong mga wires ug kable tungod sa nahisgutang peligro.

Sa Cebu City adunay ordinansa nga gipasar bahin niini ug gani aduna nay task force nga gimugna para niini apan mura og ‘ningas-kugon’ , maayo ra sa pagsugod apan paglabay sa pipila ka adlaw wala na mapadayon pa.

Pipila sa mga dapit nga nahinlo maayo ng tan-awon sa mata, dili na samok kay hitsas. Gawas pa niana, luwas na ang katawhan gikan aning mga makabitik nga mga kable o wires.

Dili unta paabuton nga duna na say laing maaksidente tungod aning mga kable ug wires, ilabi na kadtong mga wala na magamit ayha na sab magkunohay molihok paghipos niini.

Usa pa niini, kaning mga murag mga pansit diha sa mga poste, hugaw tan-awon ug makaguba sa kaanyag sa lugar.