Life Sentence

Human sa kapin 50 anyos nga pagpasundayag sa publiko, ang dinakpan nga lumod nga orca nga ginganlan og Lolita hatagan na sa iyang kagawasan ug ibalik na kini sa iyang natural nga pinuy-anan nga mao ang kadagatan. Upat ka tuig pa ang edad sa lumod sa dihang nadakpan kini. Bisan sa mga hayop, matam-is tagamtamon ang kagawasan. Makapahinumdum sa lalaki nga napugos pagpakasal tungod sa hulga sa amahan sa babaye nga mapriso kini sulod sa 20 anyos kon dili niya pakaslan ang iya’ng anak. Sa kahadlok nga mapriso, gipili sa lalaki ang kaminyoon. Paglabay sa 20 anyos nga pagpuyo sa gubot nga kaminyoon, nakapamalandong ang bana nga kon gipili pa niya ang prisohan, makagawas na unta siya karon. Apan kay nagminyo man, life sentence ang iyang nahiagoman. Fezteleern!

NAHISAMA’G BAND-AID

Giangkon ni Presidente Marcos, Jr. nga ang padayon’g pagsaka sa presyo sa mga batakang palaliton nagpabilin nga labing dakong suliran sa mga Pilipino. Isip tubag sa maong suliran, gihimug-atan sa Presidente ang pag-abli og daghang Kadiwa aron matabangan ang mga konsumidor ug mga gagmay’ng magpaptigayon. Dili gayod tubag sa suliran sa food security ang Kadiwa. Ang tinud-anay nga pag-atiman sa sektor sa agrikultura ang labing mahinungdanon nga tahas sa kagamhanan. Ang Kadiwa nga solusyon nahisama ra’g nagbutang ka og band-aid sa samad nga kinahanglan na unta operahan ug tahi-on. Muleeng!

MAHIMO’NG KARNABAL

Gihinganlan ni Senador Imee Marcos ang International Criminal Court (ICC) nga usa ka “kengkoy sa international justice” tungod sa pag-ipit niini sa Pilipinas ug uban’g nasud sa Africa sa giingon’g mga krimen batok sa katawhan, apan nagpakabuta kini sa mga pang-abuso sa human rights sa mga kanasuran sa kasadpan’g bahin. Adunay punto ang pagdumili sa kagamhanan sa pagpaubos sa imbestigasyon sa ICC sa atong mga opisyales. Haum ni’ng pamahayag ni Senador Marcos ang panultihon nga, “Kon ang gupon (clown) o kengkoy pasudlon sa palasyo, dili siya mahimong hari, hinonoa, mahimong sirkus o karnabal ang palasyo.” Pagkatoytoy!

NALAWGAW ANG SUGYOT

Alang kang Bise-Presidente ug DepEd Secretary Sara Duterte, imposible ug layo ra sa tinuod ang panawagan sa Alliance of Concerned Teachers (ACT) Partylist nga kinahanglan mo-hire ang kagamhanan og 30,000 ka magtutudlo ingon man ang pagtagana og budget nga 100 bilyon matag tuig. Husto unta ang panawagan sa ACT sa pag-hire og dugang magtutudlo apan nalawgaw na hinoon. Nahisama ang maong sugyot sa sud-an nga lami kaayo sud-ongon apan sa dihang gitilawan na, nakapamalikas ang mikaon tungod sa labihan kaparat niini. Madahaan!

PAG-PAGAWAS SA PUNDO??

Sumala sa report sa National Nutrition Council (NNC), midaghan na karon ang mga tambok, overweight ug mga putot sa mga kabataang Pilipino. Tungod niini, milusad ang kagamhanan sa proyekto nga Philippine Multisectoral Nutrition Project (PMNP) aron pagtubag sa naasoy’ng mga suliran sa kabataan. Daghan na ang susama’ng programa nga gilusad sa kagamhanan apan kuyanap ug padayon gihapon ang maong suliran. Matud pa sa akong amigo, “Himo-himo na pud og programa, aron makapagawas na pud og pundo”. May’pag moligeed!