House Bill 4609 dugang sakit

Hait ug salto kaayo ang  unang labok nga gihimo ni Cebu City South District Representative Eduardo ‘Edu’ Roa Rama sa 19th Congress diha sa iyang pagpanday og House Bill 4609 or Magna Carta of Private Health Workers.

Diin, ang gamay’ng suweldo nga hagbay rang giantos sa atong health workers sa mga pribadong ospital o buhatan, sama pananglit sa mga nars, kinsa magdawatan ra og P16K-P20K matag bulan, patas-an na. Himoon nang P35K diha pa lang sa ilang paghisulod-sugod og trabaho.

Nindot kining giumol nga balaod-on ni Kongresista Edu. Makalipay sa private nurses ug health workers. Apan sa samang higayon, adunay dakong domino effect.

Kay kon patas-an na unya sa mga pribadong ospital ang ilang suweldo, seguradong tuboan sab sa mga nanagumala ang presyo sa doctor’s fee, room rate ug tanan nilang kahimanan ug pasilidad.

Gani, hagbay rang adunay doktor nga tag P1,000 na ang consultation fee. Hinuon, dili mabasol ang mga doktor, kay mahal sab baya ang abangan sa dapit diin mahimutang ilang klinika.

Busa, kon tuboan unya ilang abangan, posibleng tuboan sab nila ilahang consultation-doctor’s fee.

Ug kinsay magbaguod sa pagpas-an niining dagkong balayranan nga ipatong sa mga pribadong tambalanan? Siyempre, ang mga pasyenting nagpa-admit, kinsa gustong mamaayo sa ilang sakit.

Apan imbes tabangan nga magaangaan ilang dughan, gidugangan pa hinuon silag laing matang sa sakit – ang sakit sa walay kukaluoyng kamahal sa balayranan nga makabuslot sa bulsa.

Akong silingan, kinsa titulo sa iyang balay’g lote maoy gihimong garantiya aron lang ma-admit sa pribadong ospital, namatay intawon, uy! Unsaon na lang ang walay ikagarantiya?

Maayo unta kon may kongresista o senador nga moumol pod og balaod nga bisag padak-an ang suweldo sa mga nars ug health workers sa private hospitals, ang balayranan sa pasyente magpabilin sa naandan. Dili mapatas-an. Ug kaya ba, sa atong mga magbabalaod ang pagbuhat sa ingon?

Ang House Bill 4609 usa ka happy problem. ‘Happy’ kay good news para sa health workers. Ug ‘problem’ kay naghatag og dugang sakit sa pasyenteng magpa-admit. Sama sa panagway sa panahon: may makalipay, aduna poy makalaay.

Dili ba, mao man kini ang kalibotan nga atong gipuy-an? Unta, hisabtan kini sa tanan.