Labing bililhong mga Pinaskohan
Wa na kong kahinumdom unsang mga buwana nako nadawat ang mosunod nga mga gasa pero giisip nako sila nga labing makahuloganon nga mga pinaskohan:
• Gugma sa pagsibya gikan ni Natalio “Talyux” Bacalso (akong nabati ang iyang mga komentaryo sa radyo batok sa diktadora ni Ferdinand Marcos Sr. human sa iyang paghimo og mga pelikula ug sa wa pa mapili nga assemblyman);
• Unang kahigayonan sa pagsibya sa radyo gikan ni Cerge Remonde (nga nihimo nakong sakop sa iyang bantogan nga “A” Team sa DYLA, pero ang nidawat sa akong aplikasyon mao si Sam Costanilla nga maoy news director niadtong higayona);
* * *
• Unang kahigayonan sa pagsuwat sa pamantalaan gikan ni Juanito Jabat (tinun-an pa ko sa Talisay Malayan Academy sa Talisay City nga way makinilya pero wa siya mobalibad sa akong mga sinuwat nga kinamot sa yellow pad);
• Unang kahigayonan sa pagtagik og mga titik sa awit gikan ni Dr. Jose “Sir Dodong” Gullas (bisan wa pang kasuway gidawat niya ang kabos nakong mga garay ug gipahaom sa huni sa bantogang Maestro Mil Villareal);
• Unang kahigayonan sa pagsibya sa telebisyon gikan ni Marcial Sanson (nagsugod ko og sibya sa DYAB dihang gipalingkod isip usa sa mga tagduma sa “Banat Visayas, Sulong Mindanao” nga giapilan sa tanang regional stations sa ABS-CBN sa Kabisay-an ug Mindanao);
* * *
• Nagtudlo nako pagpadala sa labing unang email si Atty. Bingo Gonzalez (kinsa naluoy nga nagtan-aw nakong gipaningot sa pagbaktas kada adlaw gikan ug paingon sa ABS-CBN ug The Freeman aron pagsumiter sa akong column);
• Unang nihatag nako og imbitasyon sa Gmail (nga nitanyag og one gig niadtong katuigan nga ang labing popular nga email service nipahamtang og limitasyon nga 512 mb) mao si Bino Guerrero;
• Unang nakong scholarship gikan sa Ramon Aboitiz Foundation Inc. (RAFI) nakapatiwas nako sa kolehiyo sa University of San Jose-Recoletos;
* * *
• Una nakong hagbong sa College of Law sa University of San Carlos (diin scholar sab ko ni Wilfredo “Baby” Camomot) nakatudlo nako sa di pagpatugatuga pagsugod og gimbuhaton nga wa kay interes sa pagtiwas); ug
• Niluwas nako gikan sa wa kinahanglanang away uban sa akong labaw si Ma’am Tata Cinco-Sy kinsa nibalik nako sa DYAB gikan sa TV News sa ABS-CBN Cebu.
* * *
- Latest
