Free parking maayo pero giabuso

Dalaygon ang pagduso og House Bill No. 5292 (Mandatory Free Parking Area Bill) ni South Cotabato 2nd District Congressman Peter Miguel kay ako mismo makadaghan na mahiagom sa kadako sa mabayran sa parking fee bisag ang hinungdan sa kadugay sa pagparking mao ang klinikang nahimutang sa iladong private medical center.

Allas 10:00 sa buntag kining moabli. Pero tagsa rang makapangalagad pagsayo ang mga doktor kay morawon pa baya sa ilang mga pasyente didto sa ospital. Samot na akong doktor, kinsa daghan kaayog pasyente, busa daghang pong nanga-admit nga pahigayonan nyag rawons kada adlaw.

Hinungdan, nga maabtan gyod og taas nga oras ang pagpinaabot namong suking pasiyente nga magpatsek-ap. Usahay, maabtag kaadlawon. Busa, dako sab og parking fee nga mabayran.

Busa, thumbs up ko sa Free Parking Area Bill ni Rep. Miguel. Kay dako kinig ikatabang sa mga motoristang hagbay rang gibun-og sa parking fee.

Hinuon, dili baya mabasol ang mga tag-iyag malls kon magpabayad og parking fee sa mga mogamit. Ngano? Tungod kay adunay mapahimuslanong tawo nga mohimo sa libreng parking area nga daw kaugalingon niyang garahian.

Sama sa nahitabo sa parking area sa usa ka simbahan. Diin, ang parkinganan sa mga manimbahay gipakasama na lang garahian sa mga walay kaparkingan sa ilang balay. Busa, dihang nasubay sa kaparian ang maong suliran, gidili na ang whole night parking. Pero sa pagpangaligid sa mga adlaw, gitugot ra kini. Pero may bayad na.

Basin mao kini hinungdan nganong may supermarkets maningil gyod og parking fee. Kay dili gustong maabusohan.

Sa laing bahin, dapat lang himuong mandatory ang free parking alang sa mga lehitimong kustomer, kinsa adunay ikapakitang resibo sa mga butang nga ilang napalit. Gani, sa dili pa tukoron ang mall, gi-require man sa gobiyerno ang paggahin og parking area para sa customers. Nga libre dapat. Kon nahimo kini sa S & R ug Landers, nganong dili man makasunod ang uban?

Hinuon, aron pagkontrol nga dili abusohon ang free parking, mas bentahang butangan kinig limit sugod duha hangtod tulo ka oras. Ug kon molapas, dinhi na mosugod pagpatak ang bayranan. Mas patas. Unya, dili pa mawad-ag trabahao ang parking fee cashiers ug security guards.