EDITORYAL - Yawyaw sa ayuda

Pwerteng sabaa sa mga tawo diha sa social media bahin aning P5 mil nga ayuda gikan sa gobiyerno ug sa ilang lokal nga kagamhanan. Lisod kaayo iesplikar ug bisan giunsa pa og esplikar daghan pa gihapon ang wala makasabot.

Pipila ka adlaw human sa pag-igo sa bagyong Odette, mianunsyo si Pres. Duterte nga motabang ang gobiyerno sa mga biktima og tag P5 mil. Karon ang gilalisan ug maoy gibalikbalik sa mga netizen kung kada pamilya ba o kada balay maoy tagaan og P5 mil nga ayuda.

Dunay miingon nga kada pamilya, ug duna say miingon nga kada balay, bahala og pila pa ka pamikya ang nagpuyo. Sa mga balay nga tag tulo ka pamilya ang namuyo dili na ikahibulong nga mangisog gyud sila nga “kada pamilya” gyud daw ang hatagan. Samtang kadtong tagsa lang ka pamilya ang nagpuyo, moinsister sab nga kada balay ang pahatagan sa maong cash assistance.

Ang duha ka habig parehong naapektahan sa bagyo. Gani wala may gipili si Odette, nabahinan man gyud tanan sa kadaut. Apan tungod ba kaha sa desperasyon sa kahimtang karon, way tubig, way kuryente, way internet, dugangan pa aning pandemiya mao tingaling ingon ani ang taras sa mga tawo. Apan unsaon man kaha sa mga mayor ug local official nga mahatagan ang tanang pamilya kun ang gihatag nga pundo para sa ayuda gikan nasudnong gobiyerno kuwang man, subay sa gitug-an sa DSWD-7?

Nabutang sa dili paborableng posisyon karon ang mga mayor kay sila man maoy gipaninglan sa tanan. Unya hapit na baya ang eleksyon, nagamit na kining isyuha sa mga kaatbang sa mga nagkingkod. Kang kinsa man ning sayup? Kang Duterte? Sa DSWD? Sa mga mayor ba kaha?

Dili ba kaha sayop lang gyud ang mga tawo pagsabot sa sitwasyon nga naa pa karon sa pandemiya ang nasud, dakong kwarta ang nagamit para ani. Karon dunay nahitabong bagyo, daghang nangaguba ug daghang mga tawo nasab ang kinahanglang tabangan. Apan sa tanang mga nabiktima, kinsa kaha kanila ang maoy angayang tabangan og una? Nabutang ba kaha ni sa hunahuna aning mga nagsige og yawit diha sa Facebook?