Managlahing dagway sa pandemiya
Sa pagtimaan sa Piyesta Senyor sa Sugbo karong tuiga, usa ka tuig ug pila ka adlaw human unang nikatap ang COVID-19 sa Dakbayan sa Wuhan sa China nga nakapaluhod sa kalibotanong ekonomiya, nga human nitidlom na unta ang mga kaso dinhi sa ato nihulga na sab karong bag-o sa pagsulbong pagbalik, abunda ang mga timaan nga, sama sa nangagi nga mga katalagman nga nitay-og sa kanasuran, ang pandemya:
Nakapatumaw sa makadasig nga mga timaan sa paghiusa ug pagtinabangay; apan
Nakatukas sab sa law-ay nga mga pasundayag sa kahakog ug kamapahimuslanon.
* * *
Tam-is nga bunga sa lisod matupngan nga pagsaw-anay sa kasayuran ug teknolohiya sa nagkalainlaing kanasuran ang pagkaplag sa di lang usa kon dili daghan nga bakuna, nga mao ang kinapaspasan sa gatosan ka katuigan nga pagpangita og panagang sa mga kagaw.
Maong human sa taas nga kalbaryo sa atong pagkatanggong sa kabalayan, nga nisangpot sa paghagsa sa minilyon ka patigayon ug panginabuhi, may makab-ot na nga saad sa paglingkawas sa katalagman ug inanay nga pagbalik sa naandan nato nga pakighimamat sa atong mga minahal sa kinabuhi, pagpanaw ug inadlawng pagpanikay-sikay.
* * *
Apan ang mga bakuna nisangpot sab sa iyahay sa labing adunahan nga mga nasud: Gisipong ang nihit nang daan nga pasiunang suplay sa mga bakuna ginamit ang nagbuntaog nilang katigayonan bahala na kon mumho na lang ang nahibilin sa mas nagkinahanglan unta nga kabos nga kanasuran.
Ang kapakyas pag-umol sa kalibotanong sistema sa makiangayon nga pag-apud-apod sa mga bakuna mao say laing pagmatuod sa kainutil sa United Nations (UN) nga mahimo rang pikatan sa Estados Unidos ug ubang kanasuran.
* * *
Taliwa sa lang-og nga pahimus, nituyhakaw ang mga alimyon sa katarung: Usa nila ang di katuohan nga tanyag sa kadagkoan sa AstraZeneca ug University of Oxford sa Britanya nga di sila magpaginansiya, mao nga ang ilang bakuna maoy kinabaratohan sa mga napamatud-an nang luwas ug epektibo.
Ug taliwa sa pagkabayo sa mga bakuna alang sa bangis nila nga pamolitika, napukan si outgoing US President Donald Trump ug napamatud-an nga taphaw ang ubang susama niya nga mga pangu sa kanasuran. Timaan nga bisan ang way pupanagana nga pagpamakak ug pagpangabuso sa gahom duna diay kinutoban.
* * *
- Latest
