Disarmahan?

Lahi-lahi ang nahimong reaksiyon sa publiko sa mikatap nga video diha sa social media nga nagpakita sa usa ka polis nga mipusil sa inahan ug anak nga iyang silingan didto sa Paniqui, Tarlac niadtong Domingo sa hapon.

Daghan ang mga mikondenar sa polis nga si Senior Master Sergeant Jonel Nuezca lakip na sa tibuok organisasyon sa kapolisan. Makasabot ka sa nahimong reaksiyon sa publiko tungod kay linuog ang gihimo ni Nuezca nga pagpusil sa inahan ug anak nga sila si Sonya ug Frank Anthony Gregorio.

Apan dili makiangayon nga iduhig ang tibuok organisasyon sa PNP. Tingali dunay kakuwangan ang nangaging liderato sa kapolisan tungod sa kapakyas niini pagtangtang kang Nuezca sa serbisyo bisan sa daghang kutay sa kaso nga iyang giatubang, apan dili kini igong rason aron iduhig ang ubang polis nga nagmatinud-anon sa ilang serbisyo.

Dili mahimong apil si Juan sa manubag sa nahimong sayop ni Pedro tungod kay ang paghimo sa ingon maisip nga dakong inhustisya. Sama pananglit sa sugyot ni Senador Panfilo Lacson nga disarmahan ang off-duty nga mga polis aron kuno kalikayan ang samang panghitabo sa umaabot.

Angayan kunong itugyan sa mga polis ang ilang armas ngadto sa property custodian mataghigayon nga sila off-duty. Isip kanhi hepe sa kapolisan sa nasud, si Lacson maoy katapusang tawo nga akong gitan-aw nga makahuna-huna niini.

Nalimtan na ba ni Lacson nga ang usa ka pulis dunay obligasyon ug responsibilidad off-duty man siya o dili? Kun atong nuntan ang sugyot ni Lacson, buot ba niyang ipasabot nga manghinan-aw lang ang off-duty nga polis kun dunay krimen?

Unsaon nila pagrespondi kun wala silay hinagiban? Ato na bang nalimtan ang daghang mga insidente diin usa ka off-duty nga polis ang nahimong mga bayani?

Tungod sa ilang pagpatuman sa balaud dili imposible nga daghan ang nasuko sa mga polis ug posibleng nagtinguha pagpatay nila. Unsaon nila pagpanalipod sa ilang kaugalingon sa panahon nga sila off-duty kun kuhaan nato sila og armas?

Ang angayang buhaton pagsulbad sa problema dili ang hinanggaw nga sugyot kun dili ang pagpahigayon og neuro test sa tanang sakop sa kapolisan matagkaron ug unya. Angayang mahibaw-an sa kadagkuan sa PNP kinsay ilang mga sakop nga dili na haum isyuhan og armas. Angayan sab nga palig-onon ang recruitment system sa PNP ug likayan ang palakasan ug bata-bata system aron masiguro nga tanang aplikante moagi gyud og neuro ug psychological test.