Corona sa kawalay kapaingnan, batok Adbiyento

Nobiyembre 29, 2020: Unang Domingo sa Adbiyento

Mga Pagbasa: Is. 63;16-17,19;64;2-7/Sal. 80/1 Cor. 1;3-9/Mk. 13;33-37

Tayming kaayo nga ning panahona nahitumpawak kita sa binuang ug hinanggaw nga epekto sa virus nga ginganlan og Corona. Sakit nga di masabtan ug lisod tugkaron ang epekto ang padayong nihasi halos sa tanang aspeto sa atong kinabuhi. Sakit kaayo dili ba? Ug samtang gilugakan ang turismo padayong gipanghingusgan ang paglisudlisod sa simbahan ning panahon sa naandang Misa de Gallo. Karong Dominggoha mao ang sinugdanan sa laing tuig sa atong Liturgical Cycle sanglit karong Dominggoha Dominggo man sa Adbiyento.

Agig balik lantaw ang pulong adbiyento gikan man sa pulong Adventus nga nagpasabot og coming. Sa atong nakat-onan sa panahon sa adbiyento atong gisaulog agig paghandum ang UNANG PAG-ABOT SA GINOO dinhi kanato mao nga preceeding season kini sa Pasko sa Pagkatawo diin nangandam kita sulod sa upat ka mga semana alang lang gyud niini. Sa laing bahin atong gipaabot pa diha sa paglaum ang iyang IKADUHANG PAG-ABOT nga mao ang PAROUSIA. Kun kanus-a kini mahitabo wala ta masayud. Ang mahinungdanon andam kita og igmat sa sunod nga mga panghitabo.

Ang Corona nga atong nasinati karon, purongpurong sa kawalay kapaingnan. Walay kapaingnan tungod kay sa pagsugod pa lang daan sa maong krisis anaa naman ang malisyosong motibo sa pagpahugpa og kadaut ngadto sa uban. Ang suliran nang daan dili mahatagan og sulbad kun ang sulbad suliran lang gihapon. Mao nga padayon ang vicious cycle ning kalakiha karon. Sa laing bahin ang corona sa Adbiyento Corona sa Paglaum. Kini tungod kay ang maong cororona nagsimbolo man sa presensiya sa Dios sa tanang panahon ug sa matag liyok sa mga panahon hangtud sa hangtud.

Daghan ang atong maandam karong mga panahona taliwala sa kasinatian sa kahagip-ot  Dili lang sa pag-adorno sa atong palibot sa mga dayan dayan alang sa Pasko kondili ang pag-andam mismo sa tagsa tagsa nato ka mga hunahuna ug kasingkasing diha sa atong tinguha nga sa Dios makig-atubang sa tukmang panahon nga gilatid. Lisud man tuod ang panahon kay imbis tan-awon ang panahon diha sa positibong perspektibo sa mga panghitabo luyo sa ka negatibo niini. Ning paagiha mas makaseguro gyud unta kita sa atong survival. Ug dili lang kay sa atong survival kondili sa atong kinabuhi nga madagayaon.