E-scooter delikado
JAV BANATI - Javier Yntig Tapulado (Banat) - September 28, 2020 - 12:00am

Sa miaging Septiyembre 24, Huwebes, samtang nagmaneho ko paingon sa nagkuros nga dalan sa M. Velez Street ug V. Rama Avenue, napugos kog yatak sa brake nga dili pa unta angay sanglit ‘Go’ pa ang traffic light sa unahan nga akong giatubang.

Unsaon, kalit man lang may milabang nga e-scooter sa akong atubangan nga gisakyan sa batan-ong babaye, kinsa ingon sa wala maghunahuna unsa kakuyaw iyang gibuhat.

Maayo gani, walay behikulong nagsunod nako niadtong tungora.

Kay kon aduna pa, segurado gayod nga madumbolan ang lubot sa akong sakyanan.

 Diin, ning panahon sa pandemiya, segurado gayod nga makahatag og dakong kahasol sa hunahuna ug sa bulsa.

Igo na lang kong milingolingo samtang gisundag tan-aw ang babaye, kinsa didto mopadulong sa Chowking nga kan-anan.

Usab, sa samang higayon nakaingon ko sa akong kahiladman: “Lawgawa, uy! Gihimo na man lang duladulaan ang karsada.

Gihimo na man lang padagandaganan sa mga eskoter.”

Sa bata pa ko, gibuhatan kog eskoter sa akong Tatay nga ang lawas hinimo sa kahoy samtang ang ligid nga gitaod, biring. 

Kutob ra gyod sa sidewalk sa eskuylahan ug sulod sa eskuylahan panahon nga walay klase kami makadula. Dili mi pa-eskoteron sa karsada.

Karon, may mga moderno nang eskoter, or e-scooter nga gipamaligya sa tindahan. Sagad, may makina na. 

Unya makig-ipon ra ba pagbiyahe sa mga dagkong sakyanan sa kadalanan. Dili ba kuyaw kaayo?

Busa, saludo ko sa nakab-ot hukom sa Cebu City Transportation Office (CCTO) nga panakpon ang e-scooter ug uban pang scooter nga ubos sa 50cc nga managan sa highway sa Cebu City samtang sayo pa. Sanglit, kon kini tugotan, sundogon gyod sa may ikapalit.

Ug magpanon sama sa bagang duot sa sulom ang mga e-scooter nga mogamit sa karsadang nagkagamay na human kortehi para sa bike lanes.

Sa may e-scooter, tinuoray, makatabang kini pag-adto sa lugar nga gustong adtoan.

Apan hinumdomi, nga ang desinyo niini, dili para ibiyahe sa dalan sama sa mga dagkong behikulo. Kondili, para duladulaan lamang.

Ang tumong sa CCTO mao baya ang pagprotehir sa inyong kinabuhi ug usab sa inyong isig ka tawo.

Angay ba diayng ikasuko kon may ahensiya sa gobiyerno nga nagmahal natong mga biyahedor?

E-SCOOTER
Philstar
  • Latest
Latest
Are you sure you want to log out?
X
Login

Philstar.com is one of the most vibrant, opinionated, discerning communities of readers on cyberspace. With your meaningful insights, help shape the stories that can shape the country. Sign up now!

FORGOT PASSWORD?
SIGN IN
or sign in with