Damgo nga magkatekista
Dihang nahimo siyang pinasidunggang dinapit sa pagpanumpa sa mga opisyal sa Kapisanan ng mga Brodkaster ng Pilipinas (KBP) Cebu Chapter, si Cebu Archbishop Jose Palma gitunolan nako og gamayng papel nga may sekretong mensahe: Usa sa akong mga damgo sa kinabuhi mao nga mahimong katekista.
Apan tungod tingali sa kadaghan sa iyang gimbuhaton, o ba kaha sa kagamay sa papel nga akong gisuwatan, mahimong nataligam-an niya pagbasa ang mensahe, o wa lang siyay panahon sa pag-ulug-ulog og hamtong nga magsisibya nga nanumbong sa iyang pangandoy sa gamay pang bata.
* * *
Wa ko magdahom nga ang sunod namong panag-abot ni Arsobispo Palma pinaagi na sa Zoom atol sa kataposang general assembly sa mga kawani sa ABS-CBN Cebu gahapon, ang kataposan namong adlaw sa trabaho sa di pa hingpit nga motak-op ang sibyaanan.
Di siyay among gidapit paghimo kon dili si Msgr. Ruben Labajo, ang Vicar General sa Artsidyosesis sa Sugbo.
Kinsa maoy nangahas sa paghangyo sa arsobispo nga mas makahuloganon kon siya ang mangu sa among pangaliya ug mohatag og mensahe paggiya sa pagsugod sa among bag-ong kinabuhi human sa ABS-CBN.
* * *
Maong human nako siya pasalamati dayong paila sa tanan namong kauban nga nakugang ug nihangop sab sa iyang presensiya sa Zoom, gipahimuslan nako ang kahigayonan sa pagpahinumdom ni Arsobispo Palma sa akong mensahe sa gamayng papel.
Nagkatawa siyang nipasalig nga tingali nga mas sayo nga matuman ang akong pangandoy. Ambot kon iya na ba kong ipabansay-bansay sa pagka katekista, o may lain siyang nahunahunaan para nako, apan mahinamon kong magpaabot sa mosunod nga mga adlaw.
* * *
Dihang nagkasulti ming Msgr. Labajo pagkahuman sa emosyonal nga general assembly, gipasalamatan nako siya sa dakong pribilihiyo sa pakig-uban sa arsobispo sa among kataposang adlaw sa trabaho.
Gipahibawo ko niya nga nahinangop sang arsobispo nga nakaila ug nakauban namo.
Gipahinumdoman kong Msgr. Labajo nga samtang gitak-opan nang among sibyaanan wa mawa ang among pagka magsisibya—nga gasa nga gihatag sa Labawng Makagagahom namo ug di sa tanan.
Nga nakalipay namong nagkauyon nga magpadayon sa among mga tulomanon pinaagi sa SibyaTV sa Facebook ug YouTube. Gawas lang kon mosugot si Arsobispo Palma ug motabang si Msgr. Labajo nga mahimo kong katekista.
* * *
- Latest
